Kukësi pret Egnatian ditën e shtunë në “Kukës Arena”, sfidë që do të startojë në orën 15:00 dhe që është e vlefshme për javën e 27-të të kampionatit. Vetëm 3 pikë larg vendit të 3-të që mbahet nga rrogozhinasit ka bërë që skuadra të jetë më shumë e motivuar për javët në vazhdim.
Klubi i Kukësit ka kërkuar edhe mbështetjen e tifozëve. Për këtë verilindorët kanë menduar që stërvitjen e skuadrës ta bëjë në Kukës në stadiumin “Kukës Arena” në mënyrë që edhe tifozët të kenë mundësi të shikojnë skuadrën më nga afër, por edhe nga ana tjetër që lojtarët të motivohen.
“Ndeshja e së shtunës në ora 15:00, në “Kukës Arena”, në kuadër të javës së 27 – të ndaj Egnatias, po vlerësohet maksimalisht nga ekipi dhe klubi, të cilët kanë menduar që dy ditë të zhvillojnë seancat stërvitore në Kukës. Ekipi do jetë i grumbulluar, ku dy seancat para ndeshjes do t’i zhvillojë dhe në prani të tifozërisë , e cila është gjithnjë dhe më e prashime në stadium në mbështetje të ekipit.
Ekipi ynë ka shënuar një ecuri të mirë javët e fundit falë përpjekjve që bën i gjithë ekipi dhe stafi nën drejtimin e trajnerit, Rraman Hallaci. Nuk mund të lëmë pa përmenduar dhe mbështetjen e tifozërisë, sidomos riorganizimin e grupimit “Armata e Veriut”, që është katalizatori ndezjes së atmosferës në stadium. Nisur nga ky moment i mirë që po kalon ekipi, klubi dhe presidenca gjejnë rastin të falenderojnë gjithë mbështetësit e ekipit dhe ti ftojnë ata të jenë sa më shumë në përkrahje të ekipit këtë të shtunë”, ka shkruar Kukësi.
Lexo gjithashtu
