Është hedhur shorti për grupet e Euro 2024. Kombëtarja shqiptare ka njohur kundërshtarët me të cilët do të përballet në Europianin e Gjermanisë. E klasifikuar në Grupin B, kuqezinjtë do të luajnë përballë Spanjës, Kroacisë dhe Italisë.
Në lidhje me shortin që është tepër i vështirë ka folur Shpëtim Duron në emisionin ‘SportNews’ në ‘News24. Trajneri i Strugës shprehet se nëse do të kishte mundësi të hiqte një nga ekipet nga grupi, do të hiqte Spanjën.
Profesor, çfarë mendove kur u hodhën goglat? Cila është gjëja e parë që të shkoi ndërmend?
“Para se të hidhej shorti, nuk doja 3 skuadra: Spanjën, Portugalinë dhe Francën. Janë ekipe që përballohen vështirë. Italia dhe Kroacia kanë patur oshilacione, është herët shumë, kemi edhe 6 muaj kohë. Është ajo kënaqësi e madhe që po përballemi me këta kundërshtarë.”
Nëse të jepet mundësia, kë do hiqje Duro, vetëm një…
“Spanjën. Kjo pasi Spanja është një nga skuadrat më të fortë në botë. Vështirësia për të përballuar këtë ekip është e madhe. Bilanci i Spanjës është jashtëzakonisht negativ për Shqipërinë. Ne e dimë nivelin e tyre. Mënyra sesi luajnë ata, nuk na përshtatet aspak ne. Është një skuadër ndaj të cilës do hasim mjaft vështirësi.”
Pse e ka frikë Duka Italinë profesor? I eliminoi Maqedonia e Veriut nga Botërori, mezi u kualifikuan në Europian…
“Italia u shpall Kampione Europe me meritë, por ka patur krizat e veta. Në këto momente nuk është mirë, të shohim pas 6 muajsh. Historia e Italisë është e madhe.”
Çfarë mendon për Kroacinë profesor, a është ky rivali ku mund të synojmë pikë? Sa e vështirë do të jetë kundër tyre?
“Nuk është e njëjta skuadër. Kroacia ne e dimë shumë mirë që është fidanishte për talente. Është skuadër e rrezikshme. Gjithmonë në këto evenimente hyn me pretendime të mëdha. Ne kemi lidhje shumë me futbollin kroat. Mund të luajmë mirë edhe në këtë ndeshje. Spanja është e frikshme. Avantazhi jonë është se deri tani kemi bërë maksimumin dhe nuk kemi çfarë të humbim.”
Nuk ka favoritë në një grup me tre ekipe thotë Silvinjo profesor, si ju duket kjo deklaratë?
“Në grup dalin dy skuadra, kjo është vështirësia. Mund të dalësh edhe si e 3-ta më e mirë, por janë ndeshje me ekuilibër. Ky grup është i vështirë. Të gjitha ekipet e tjera të grupit synojnë që të ecin sa më shumë.”
Në fund profesor, me sa pikë e mbyllim këtë grup, sa shanse kemi për të kaluar më tej?
“Futbolli nuk parashikohet. Në basketboll skuadra më e mirë fiton, por në futboll ka surpriza. Nuk mund të bëhen llogari. Është një grup jashtëzakonisht i vështirë. Kam besim se do lëmë shenjë të mirë.”
Lexo gjithashtu
