Elbasani ia doli të fitonte 2-0 përballë Besës së Kavajës në ndeshjen e vlefshme për javën e 16-të të Kategorisë së Parë. “Verdheblutë” morën një fitore mjaft të rëndësishme, duke u afruar më shumë me kreun e renditjes, ku vendin e parë e mban Bylis. Këta të fundit në ndeshjen e djeshme ndaj Korabit ‘asistuan’ Elbasanin pasi u mposhtën. Kështu ekipi i drejtuar nga Nevil Dede e sheh veten 3 pikë larg Bylisit të vendit të parë, me të cilët do të përballet me 21 dhjetor.
Pikërisht për ndeshjen ndaj Bylisit, por edhe për fitoren kundër Besës, kapiteni i Elbasanit, Abaz Karakaçi ka dhënë një prononocim ekskluziv për “Newsport.al”. Kujtojmë që në ndeshjen e djeshme ndaj Besës, Karakaçi ishte protagonisti absolut, pasi ishte ai që i shënoi të dy golat për ekipin e tij.
Fitorja kundër Besës? – “Ndeshja ndaj Besës ishte një sfidë që ne e kishim vlerësuar maksimalisht si një ekip kundërshtar i radhës. Por që ishte e rëndësishme të merrnim 3 pikët. Një shtysë na e dha edhe Bylisi ngaqë mori një rezultat negativ në Peshkopi. Për ne ishte një plus i madh ndalesa e Bylisit që t’iu afronim me 3 pikë dhe fitorja neve na duhej me doemos. Por që ne e kishim vlerësuar Besën maksimalisht.”
Dy golat e shënuar në fitoren ndaj kavajasve? – “Golat ia dedikoi gjithë ekipit. Është meritë e ekipit që kam shënuar 5 gola deri më tani. Dua të falenderoj djemtë e ekipit pasi janë lojtarë që japin shpirtin në fushë. Aq më tepër, saqë çdo ndeshje që kalon ne njihemi më shumë me njëri-tjetrin pasi jemi afruar tek Elbasani nga ekipe shumë të ndryshme dhe ekipi po lidhet më shumë nga ndeshja në ndeshje. Dua të falenderoj dhe stafin, presidentin dhe profesor Nevilin që është shumë korrekt me ne, i cili është një motivim më shumë për ne që të japim 100% në fushë.”
Sfida me Bylisin? – “Ndeshja me Bylisin është e shumëpritur nga ana jonë. Do të jetë një ndeshje shumë e luftuar nga të dyja ekipet. Të themi të vërtetën, ballshiotët kanë ekip me shumë cilësi, ekip të mirë. Edhe ne kemi ndërtuar një ekip Superlige, por që luan në Kategorinë e Parë. Në ndeshjen me Bylisin ne do të japim maksimumin që të rikthehemi në vendin e parë. Ky është një motivim dyfish për ne, sepse ajo ndeshje do të jetë shumë e bukur për tu shikuar apo luajtur. Shpresoj që të dalim ne në vend të parë, por kampionati nuk përfundon në ndeshjen përballë Bylisit. Ne luajmë në fushën tonë, në stadiumin tonë. Kemi dhe tifozerinë tonë të mrekullueshme që është lojtari i 12-të për ne.”
Kundërshtari më i fortë? – “Deri më tani skuadrat që ne jemi ndeshur kanë specifikat e tyre që janë ekipet shumë të forta. Por mund të them që Flamurtari nën drejtimin e Emiliano Çelës, ishte një ekip i fortë. Por edhe Korabi është skuadër shumë e fortë, sidomos në fushën e tij dhe nuk i ndaj dot pasi të gjitha ekipet kanë vështirësitë e veta. Por ne jemi skuadër që nuk duam të diskutojmë 3 pikëshin me asnjë nga rivalët sepse jemi ndërtuar një ekip që duhet të dalë kampion.”
/Nikoll Andrea Rajta - Newsport.al/
Lexo gjithashtu
