Vesel Limaj do të vazhdojë karrierën në Rumani, pasi do të bëhet pjesë e skuadrës së Hermannstadt. 26- vjeçari do të nënshkruajë një kontratë që do ta mbajë të lidhur me rumunët deri në verën e vitit të ardhshëm. Mësohet se ka qenë Arbi Laçi, i cili ka bërë të mundur këtë transferim për mesfushorin e Tiranës.
Skuadra e re ku ai ka nënshkruar renditet në mesin e klasifikimit në Superligën rumune me 24 pikë pas 22 ndeshjes. Mesfushori do të udhëtojë të dielën në Rumani për të kryer vizitat mjekësore dhe për të nënshkruar kontratën e re. Përforcimi me Limaj mund ta ndihmojë Hermannstadt të ngjitet më lart në klasifikim dhe të tentojë pjesëmarrjen në kupat e Europës.
Limaj u largua pesë ditë më parë nga Tirana, pasi kishte pesë vite e gjysëm si lojtar në Superiore. Në vitet 2016-2017 ai ka qenë pjesë e Bylis dhe më pas për tre vite ka qenë pjesë e Kukësit. Momentin më të mirë në Superiore e arriti me Tiranën pasi u shpall kampion duke qenë protagonist.
Këtë edicion nuk gjeti shumë hapsira në skemat e Orges Shehit dhe largimi ishte opsioni më i mirë për të vazhduar karrierën e tij. Kujtojmë që në vendin tonë u tha se kishte interes për shërbimet e tij edhe nga Partizani. Por në fund ai ka zgjedhur Rumaninë, me ndërmjetësimin e ish drejtorit sportiv të Tiranës, Arbi Laçi.
Lexo gjithashtu
