Ka luajtur për një sezon me Partizanin, duke qenë një nga lojtarët më të rëndësishëm të të kuqve në sezonin 2013-2014. Mevlan Murati, mbrojtësi shtatshkurtër i Shkëndijës së Tetovës po kalon një formë të shkëlqyer në Maqedoni me skuadrën kuqezi. 24-vjeçari ka dhënë një intervistë ekskluzive për newsport.al duke ndërthurur ekipin e Shkëndijës me atë të Partizanit, ku nuk mund ta linte pa përmendur në këtë intervistë të veçantë.
Murati nuk harron asgjë nga Superiorja, madje tregon që është ndjekës i rregullt i kampionatit tonë. Për të surprizë është ekipi i Kamzës, ndërsa për Flamurtarin flet me Superlativa. Nuk mohon rikthimin në Superiore, por për këtë ai pret një ofertë serioze. Në fund nuk kishte si të mungonte edhe përshëndetja e tij për tifozët e Shkëndijës së Tetovës, "Ballistët" dhe ata të Partizanit, "Ultras Guerrils".
- Në Shqipëri iu kujtojnë te Partizani, ndërsa në Maqedoni te Shkëndija e Tetovës. Mevlan, po kaloni një formë të mirë. Cili është 'sekreti'?
Patjetër më duhet të pranoj se ndiehem krenar që kam pasur rastin të jem pjesë e këtyre dy skuadrave me peshë. Shkëndija është klubi im amë. Këtu kam bërë hapat e parë dhe përveç si profesionist bëhet fjalë edhe për skuadrën e zemrës sime ku edhe jam formuar si futbollist. Partizani i Tiranës gjithashtu mbetet një skuadër e dashur për mua sepse atje kalova momente shumë të mira. Sa i përket formës të them të drejtën nuk është se ka ndonjë sekret që do kisha 'cekur'. Jam i mendimit se me punë dhe disiplinë arrihet çdo gjë.
- Jeni aktivizuar në 14 ndeshje në këtë sezon. Si është marrëdhënia juaj me trajnerin?
Unë gjithmonë mundohem të ndërtoj marrëdhëniet më të mira me gjithë ata që bashkëpunoj dhe në saje të një korektësie profesionale me trajnerët pëlqej të ndërtoj raportet në saje të punës në terren.
E imja është që të jap maksimumin në çdo seancë stërvitore dhe në ndeshje, pasi këtë e kërkon çdo trajner prej secilit futbollist. Kujtoj se te Shkëndija kemi një grup me lojtarë shumë cilësorë dhe kjo i mundëson stafit teknik që të ketë edhe rotacione në formacion. Në kushte të tilla më e rëndësishme është skuadra të realizojë objektivat, pasi ashtu fitues jemi të gjithë bashkë.
- Në prapavijë ke partner një ish-lojtar tjetër të kuq, si Cuculi. Sa e vështirë është t'i bindeni kapitenit dhe të kuptoni lojën e njëri-tjetrit?
Me Cucin (Cuculin) njihemi tanimë një periudhë të gjatë, pasi kujtoj se ai ishte këtu që në kohën kur unë jam bashkuar për herë të parë ekipit të parë të Shkëndijës. Nuk ka vështirësi në mesin tonë, pasi si që ceka më lartë jemi grup shumë i mirë, me një atmosferë të shkëlqyer dhe jo vetëm unë me Cuculin, por secili me secilin kuptohet pa kurfarë vështirësie. Fundja paraqitjet dhe rezultatet po dëshmojnë harmoninë që mbizotëron në skuadër.
- Shkëndija duket se nuk ka rivale këtë sezon. A jeni i të njëjtin mendim?
Ky grup dhe ky sukses janë duke u projektuar një periudhë më të gjatë dhe asgjë nuk është e rastësishme. Jemi rritur gradualisht prej vitit në vit, duke arritur një nivel që këtë sezon rezulton i paprekshëm për rivalët.
Prej fillimit të sezonit synimi ishin dy trofetë e futbollit vendas, por të jem i sinqertë nuk e kam pritur të kemi një shkëputje kaq bindëse. Por rezultatet dëshmojnë cilësinë që kemi, jemi vërtet në super formë dhe fakti që ndeshjet i marrim njëra pas tjetrës na lehtëson që pa presion të vazhdojmë ecurinë pozitive.
- Rivalin tuaj të përjetshëm, Vardarin, duket se e keni vënë për fund. Kur përballeni me të a iu kujtohet ndopak derbi Partizani - Tirana?
Ky vit është i joni dhe besoj se ne do të vazhdojmë të menaxhojmë gjërat sipas planit për të mbyllur këtë sezon me dy tituj, kampionatin dhe Kupën e Maqedonisë. Vlerën e suksesit tonë e rrit fakti që konkurentin direkt Vardarin e kemi nxjerë jashta objektivave në të dy garat përmes ndeshjeve direkte dhe një fitoreje bindëse në Kupë. Përballjet me Vardarin nuk mund t'i krahasojmë me derbin Partizani-Tirana, sepse këtu ka edhe faktorë tjerë, nuk është vetëm futboll dhe paraqitja në fushë. Ndërkohë derbi i Tiranës mendoj se është në mesin e më të mirëve në Ballkan.
- Ç'kujtime ke nga Shqipëria?
Kam kujtime shumë të bukura si në aspektin profesional, ashtu edhe në jetën private. Kam kaluar një vit shumë të mirë në Tiranë dhe e kujtoj me shumë kënaqësi atë periudhë. Ishte hera e parë që luaja jashta Maqedonisë dhe ndihem krenar që me vete kam marrë kujtime shumë të bukura.
- A e keni ndjekur kampionatin shqiptar?
Sigurisht se e ndjek Superioren dhe jo vetëm unë, por në Maqedoni janë të shumtë ata që ndjekin kampionatin shqiptar. Unë jam ndjekës i rregullt i ndeshjeve të Partizanit dhe Flamurtarit ku gjithashtu kemi shumë miq.
- Cili ekip të ka surprizuar apo bërë më shumë përshtypje?
Të them të drejtën sipas mendimit tim nuk ka ndonjë surprizë më të madhe, përveç se kisha veçuar Kamzën ku luan shoku im Demir Imeri. Padyshim se te Flamurtari është bërë një punë shumë e madhe dhe pa marrë parasysh rënien në tre ndeshjet e fundit, Vlora ka bërë ekip shumë serioz.
- Po Partizanin, ish-ekipin tënd? Tashmë pjesë e të kuqve është bërë edhe shoku juaj, Besart Abdurahimi...
Unë ndjej një lidhje me Partizanin brenda vetes time. Po tani te Partizani janë Besart Abdurahimi dhe Emran Ramadani, të dy i kam shokë dhe besoj se fjalët janë të panevojshme, pasi ata më mirë do e ndjejnë vetë ambientin e kuq sepse tani janë pjesë përbërëse e ekipit
- E mendoni rikthimin në Shqipëri apo ndihemi komod te Shkëndija?
Nuk e di, ndoshta po nëse ka ndonjë ofertë konkrete dhe serioze. Në sport shpesh e themi atë fjalinë e njohur 'kurrë mos thuaj kurrë'. Te Shkëndija jam shumë mirë, kaloj momente pozitive dhe fakti që jemi afër realizimit të objektivave e bën të suksesshme këtë periudhë. Në fund të këtij sezoni më skadon kontrata dhe pastaj mbetet të shohim se si do të rrjedhin gjërat. Por për momentin nuk i mendoj këto, pasi fokusi im është që të mbyllim sezonin me fitimin e kampionatit dhe Kupës.
- Një përshëndetje për tifozët e Shkëndijës? Po për ata të Partizanit?
Shkëndija ka 'Ballistët', ndërsa Partizani 'Guerrilsat'. Unë jam krenar që kam qenë i respektuar nga këto tifo-grupe, të cilat vërtet janë lojtari i 12-të për ekipin. Mendoj se kanë rol shumë të madh në ecurinë e ekipeve për të cilat bëjnë tifo, prandaj me këtë rast i përshëndes nga zemra dhe i falenderoj publikisht që gjithmonë më kanë mbështetur, duke më dhuruar shumë dashuri. /Retin Toka/
Egnatia, Vllaznia, Dinamo dhe Partizani deri më tani në “Final Four”. Mendoni se do të ketë ndryshime deri në fund të Superiores?
-
Po
-
Jo
-
Nuk e di
