Ish-kapiteni i Luftëtari, Mersini: Në Gjirokastër më trajtuan si dikë të rrugës, si të pavlerë, por tani iu uroj suksese në jetë

Ergys Mersini zhvilloi sot ndeshjen e parë si ish-kapiten i Luftëtarit kundër ekipit gjirokastrit.

Mbrojtësi i majtë që u largua nga Luftëtari në merkaton e dimrit, kaloi te Flamurtari dhe sot zhvilloi një ndeshje shumë pozitive.

Pas fitores së vlonjatëve kundër Luftëtarit, Mersini u shpreh se u zhgënjye nga largimi dhe deklaroi se e larguan si dikë të rrugës, madje ka qenë trajneri ai që e ka kërkuar një gjë të tillë.

“Ishte e vështirë të orientohesha në minutat e para kundër Luftëtarit, sidomos kur dëgjoja zërat e ish-shokëve të mi të skuadrës.

Kam luajtur edhe më parë kundër Luftëtarit, por këtë herë ishte disi më ndryshe, sepse vija si ish-kapiten.

Luftëtari ishte një ekip i vogël, me djem që kanë dëshirë për të luajtur, ndërsa te Flamurtari ndryshojnë gjërat. Kjo pasi Flamurtari është një klub i madh, nga i cili pritet gjithnjë maksimumi.

Vetëm në Gjirokastër ndodh që, të jesh mirë e bukur në shtëpi dhe më pas të të largojnë papritur.

Jam i zgjënjyer. Më trajtuan si dikë të rrugës, si i pavlerë. Isha unë ai që ngrita kupën një vit më parë me Luftëtarin dhe njeri i afërt atje te ajo skuadër. Por, ndodh që dikush të merr në telefon dhe të thotë se trajneri nuk të ka në plane. Është e çuditshme, por ju uroj atyre njerëzve: suksese në jetë! Megjithatë, i them faleminderit, sepse sot jam te Flamurtari”, deklaroi Mersini në “Gol pas Goli” në Supersport.