U largua nga Partizani në merkaton e verës, megjithatë Ylber Ramadani nuk e harron asnjëherë kampionatin shqiptar. Talenti nga Kosova ka dhënë një intervistë për newsport.al ku ka rrëfyer ecurinë e aventurës së tij me skuadrën daneze.
E ardhmja e tij duket sa afër Veljes, aq edhe larg. Vetë ai tregon që në këtë merkato dimri ka pasur oferta për t'u larguar, megjithatë vetëm fundi i sezonit do ta zbulojë një gjë të tillë. Në fund nuk mund të lërë pa përmendur, ish-ekipin e tij, Partizanin.
- Ylber si po të shkon aventura futbollistike në Danimarkë?
Jam shumë i kënaqur. Gjithçka po shkon sipas parashikimeve. Kemi bërë një ekip të mirë, jemi në vend të parë dhe pretendojmë Superligën.
- A është Velje skuadra e duhur për ty?
Unë jam shumë i lumtur me ekipin e Veljes sepse këtu kam gjetur formën time më të mirë. Dua të jap maksimumin dhe uroj që në fund të arrijmë objektivin siç e përmenda më lart.
- Sormani një trajner i njohur për ty. A është e njëjtë puna e tij si te Partizani?
Trajneri Sormani është ai që më ka sjellë mua në këtë formë. Më motivon shumë duke më shtyrë që të kem gjithmonë besim te vetja. Dua ta falënderoj publikisht për punën që po bën me mua. Nuk lodhet asnjëherë dhe gjithmonë është aty për të më mësuar si të bëj më të mirën.
- Ç'plane ke për të ardhmen? Do të vazhdosh të qëndrosh te Velje apo mund të largohesh nga Danimarka?
Nëse ngjitemi në Superligë, me dëshirën e mirë të drejtuesve do të qëndroj këtu. Pse jo mos të jemi ne skuadra surprizë e sezonit të ardhshëm. Nëse nuk ngjitemi, e kam biseduar edhe me drejtuesit e do të largohem drejt një kampionati tjetër. Mund t'iu them që tani në janar kemi pasur disa oferta.
- Meqenëse përmendet oferta, a mund të na zbuloni skuadrat?
Emrat e skuadrave nuk mund t'i them, por iu konfirmoj që janë nga Zvicra dhe Gjermania.
- Nëse do të vinte një ofertë nga Superliga shqiptare, sigurisht tunduese. Do ta refuzoje?
Ç'është e vërteta, hë për hë nuk mendoj të kthehem në Shqipëri. Është shumë i vështirë rikthimi në Superiore sepse tashmë sapo kam bërë një hap në arenën ndërkombëtare. Dua që të shkoj sa më lart.
- I ke ndjekur zhvillimet në Shqipëri?
Po, i kam ndjekur të gjitha. Sidomos atë që ndodh me Partizanin e ndjek gjithmonë, pasi nuk mund të harroj atë që më ka dhënë ai ekip. Do t'i jem mirënjohës, sepse falë skuadrës së kuqe, unë jam sot këtu.
- Meqenëse përmendët Partizanin, ç'mendim ke për "furtunën" e ndodhur së fundmi?
Për sa i përket largimeve nuk mund të them diçka. Mendimi im është se drejtuesit e Partizanit janë ata që e dinë më së miri arsyen dhe e kanë treguar edhe më parë që nuk gabojnë në zgjedhjet e tyre.
- Po për merkaton e skuadrave të tjera?
Në fakt, edhe në këtë pyetje dua të fus Partizanin. Vërtetë ka pasur shumë largime, po mos të harrojmë që drejtuesit kanë sjellë së fundmi në skuadër disa lojtarë, të cilët do të shpërthejnë me fanelën e kuqe. Të jeni të bindur! /Retin Toka/
Lexo gjithashtu
