Sfida e parë e Kombëtares kuqezi në Eliminatoret e Botërorit “Rusi 2018” është ajo kundër Maqedonisë. Një përballje e zjarrtë mes dy skuadrave fqinje, që pritet të ndezin “Loro Boriçin” më datë 5 shtator. Përveç rivalitetit sportiv, fakti që në Maqedoni banon një numër i lartë shqiptarësh e bën edhe më speciale këtë përballje, me më shumë rivalitet dhe dëshirë për të triumfuar dhe për të marrë tri pikët.
Por gjithçka mbetet brenda aspektit sportiv dhe të dyja skuadrat do të kërkojnë më të mirën nga kjo sfidë.
Kjo do të jetë një ndeshje me ngarkesë emocionale edhe për 5 lojtarët shqiptarë që janë në listën e 18-shes së përfaqësueses së Maqedonisë për sfidën ndaj kuqezinjve.
Por jo vetëm për ta, pasi në përbërje të skuadrës maqedonase është edhe Kire Ristevski, një njohës i mirë i kampionatit të vendit tonë.
Mbrojtësi i majtë është aktivizuar për 3 vite e gjysmë në Kategorinë Superiore gjatë gjithë karrierës së tij, duke luajtur për Elbasanin 1 sezon, Bylisin 2 sezone dhe për Tiranën për 6 muaj.
[caption id="attachment_29650" align="alignleft" width="300"]
Kire Ristevski kur aktivizohej me Tiranën në një dyluftim shpejtësie me Emiljano Vilën gjatë një ndeshjeje derbi[/caption]
Lojtari maqedonas që tashmë aktivizohet në Hungari me ekipin e Vasas, skuadër që kryeson këtë kampionat, në një prononcim për newsport.al pranon se ndeshja ndaj Shqipërisë do të jetë e veçantë edhe për të. “Kam kaluar një periudhë shumë të mirë në Shqipëri dhe ndeshja ndaj kuqezinjve do të jetë speciale për mua. Kam shumë miq shqiptarë dhe shpresoj që disa prej tyre të kem mundësi t’i takoj në Shkodër. Vërtet që për mua do të jetë një ndeshje me ngarkesë emocionale të lartë”, pohon Ristevski.
Përtej mirënjohjes që ka ndaj Shqipërisë, 25-vjeçari pranon se më 5 shtator do të kërkojë të ndihmojë ekipin e tij që të marrë tri pikët: “Duam ta nisim me fitore këtë edicion të ri Eliminatoresh. Nuk do të jetë e lehtë, por do të tentojmë të marrim tri pikët. Unë e njoh shumë mirë mentalitetin e futbollit shqiptar dhe do përpiqem të vendos në punë edhe këtë element për të realizuar objektivin qe kemi në sfidën kundër kuqezinjve”, pranon Kire Ristevski i cili është edhe titullar në kombëtaren e Maqedonisë.
Për sa i përket atmosferës në shkallët e stadiumit “Loro Boriçi” më 5 shtator, Ristevski shprehet se pret një numër të lartë tifozësh shqiptarë në mbështetje të ekipit që drejtohet nga De Biazi. “Sigurisht që do të jenë të shumtë tifozët shqiptarë. Luhet në Shqipëri dhe kjo është normale. A do ketë tifozë maqedonas? Nuk besoj se do të vijnë në Shkodër!”, deklaron mbrojtësi i majtë i Maqedonisë për newsport.al.
[caption id="attachment_29651" align="alignleft" width="300"]
Kire Ristevski gjatë periudhës që aktivizohej me Bylisin në dyluftim me Tomislav Bushiç[/caption]
Në fund të fjalës së tij, 25-vjeçari nuk harron të veçojë Lorik Canën si futbollistin më të mirë që ka ekipi kuqezi në përbërje. “Nuk kam informacione nëse Cana do të jetë kundër nesh apo jo, por di të them se pa diskutim që është futbollisti më i mirë që ka Kombëtarja kuqezi .
Pjesëmarrja në ‘Euro 2016’ ishte një sinjal se Shqipëria e ka rritur nivelin e futbollit dhe ka lojtarë shumë të mirë. Gjithashtu, pas suksesit të Skënderbeut një vit më parë, edhe kualifikimi i Partizanit pak javë më parë ndaj Ferencvarosh tregon se futbolli aty është duke u rritur me hapa të shpejtë”, përfundoi Kire Ristevski, i cili më 5 shtator do të jetë një nga kundërshtarët që do të zbresin në fushë në “Loro Boriçi” kundër kuqezinjve.
Lexo gjithashtu
