Është vetëm 16-vjeç, por shihet si një nga talentët më premtues shqiptarë që luajnë në Itali. Riad Krasniqi, sulmuesi i Genoas, që është në pronësi të klubit të Interit ka dhënë një intervistë ekskluzive për newsport.al.
Ai ka marrë një ftesë nga përfaqësuesja shqiptare dhe është gati për t'u provuar në grumbullimet që bëhen në muajin dhjetor. Është ende i vogël dhe kur pyetet nëse do të bëhet si Rei Manaj, ai thotë: "Jam akoma i vogël". Në fund 16-vjeçari ka një mesazh emocionues për të gjithë.
- Riad përshëndetje! Ju keni marrë një ftesë nga kombëtarja shqiptare për t'u grumbulluar. Si ndihesh?
Po, është e vërtetë. Kam marrë një ftesë nga kombëtarja kuqezi për provat që zhvillohen. Edhe për mua, ashtu si të gjithë shqiptarët është një privilegj i madh. Shpresoj dhe uroj që t'ia dal mbanë duke bindur trajnerët.
- Je lindur në Kosovë, jeni pjesë e Interit, por luani me Genoan. Na zbulo pak më shumë për veten tënde...
Futboll kam nisur të luaj në moshën 10-vjeçare me skuadra amatore. Jetoja në Pavia dhe zgjodha një ekip amator për të nisur karrierën time.
- Por, si arrite të kaloje te Inter? Ose më saktë, si u bind klubi zikaltër të blinte kartonin tënd?
Kam luajtur me një skuadër afër Milanos. Në atë ndeshje u paraqita mjaft mirë dhe më nxorrën në gazetë. Drejtuesit e Interit e panë, erdhën më vëzhguan dhe u bindën nga aftësitë e mia.
- Ju luani si sulmues, njësoj si Rei Manaj. Mendon se do të kesh një të ardhme si ai apo do të arrish të qëndrosh te një klub i madh siç është Inter?
Rei Manaj është një lojtar mjaft i fortë. Unë ende jam i vogël, por një ditë dua të jem si ai. Manaj vlen shumë dhe këtë e ka treguar në fushën e blertë. Kur të rritem, të shoh çfarë do të ndodhë. Tani është herët për të krahasuar veten time me të.
- Riad, a jeni ftuar nga përfaqësuesja e Kosovës?
Jo, asnjëherë.
- Ku e sheh të ardhmen tënde?
Nuk e di. Në fillimet e mia, domethënë në ëndrrat e mia ka qenë skuadra e Milanit ajo që unë doja. Tani nuk mund të flas më. Po luaj te Genoa, jam pjesë e Interit dhe për këtë jam shumë i kënaqur.
- Shqipëria ka një skuadër përfaqësuese që ka arrit nivele të larta. Nëse edhe Kosova do të ishte e tillë, do ta ndërroje duke qenë se është vendi yt i lindjes?
Kosova dhe Shqipëria për mua është një! Unë luaj për Kombëtaren kuqezi!
- E fundit, për të gjithë ata që nuk zgjedhin Shqipërinë, a ke diçka për t'i thënë?
Dua t'i them të gjithëve: Më mirë të përfaqësojmë Shqipërinë se sa të rrimë me "qera" në shtetin e të tjerëve. Më mirë të përfaqësojmë ekipin e zemrës, se sa për interesa shtetin e të tjerëve. /Retin TOKA/
Lexo gjithashtu
