Presidenti Duka u shpreh i kënaqur për paraqitjen e kuqezinjve këtë Europian, për atë që dhuruan në fushën e lojës, për tifozët që e fituan ndeshjen e tyre në tribunë. Presidenti me keqardhje nuk harroi të përmendte dy ndeshjet e para, ku një pikë do të mund t’i kishte kualifikuar.
“Duhet të jemi të gjithë krenarë. Mendoj se kemi dalë të fituar. Ishte një eksperienc fantastike. Në të ardhmen do të kemi diçka më të mirë. Për të qenë realist nuk debutuam si skuadër e dobët. Ndiheshim të barabartë me të tjerët, si një skuadër me shumë vlera. Duhej të merrnim një pikë në dy ndeshjet e para. Ndoshta shorti na penalizoi, ku të gjithë luanin duke bërë llogaritë mbi ne, por ne largohemi në mënyrë dinjitoze nga ky kompeticion. Largohemi me nje fitore qytetarie. Nesër në 11:00 nisemi nga Franca. Do të ketë një pritje të madhe nga gjithë shqiptarët, dhe qeveria shqiptare ka menduar diçka të veçantë për ne. Do të ketë takim simbolik me kryeministrin dhe pastaj do zbarkojmë të gjithë në “Fan Zone” për të festuar me shqiptarët, të cilët kam marrë vesh që janë të kënaqur dhe ndihen krenar me ne”, tha Duka.
I pyetur për të ardhmen e Lorikut, presidenti deklaroi:
“Unë besoj se do të kemi prapë mundësi për të fol për Canën. Dua të them vetëm një detaj të vogel. Pas ndeshjes me Rumaninë, i putha të gjithë lojtarët, ndërsa kur shkova te Loriku e putha dhjetë herë. Ka treguar një sjellje jashtëzakonisht superprofesioniste”, ka përfunduar presidenti i Federatës Shqiptare të Futbollit.
