Gjithçka zyrtare! Franco Lerda është trajneri më i ri i Partizanit. 51 vjeçari ka arritur akordin me klubin kampion të Shqipërisë, teksa vetëm pak momente më parë foli për herë të parë si "dem".
Karriera mjaft e suksesshme e Lerda i ka bindur drejtuesit për të firmosur me italianin, që do të pasojë në këtë rol trajnerin kampion, Skënder Gega. Ai firmosi një kontratë 1 vjeçare me kryeqytetasit, me opsion rinovimin e saj.
Por kush është Franco Lerda, bomberi që firmos vetëm kontrata 1 vjeçare? Ish-sulmuesi i Torinos, Chievos, Brescia dhe Napolit lindi më 19 gusht 1967 në qytetin e Fossanos, aty ku hodhi edhe hapat e para si futbollist. Pas dy viteve me Fossanese, Lerda kaloi nga një sezon te Saviglianese dhe Centallo.
Më pas, Cuneo e mirëpriti Lerda për dy sezonet e ardhshme, për tu bashkuar më pas me Torinon në sezonet 1883-1985. Forma e treguar me të rinjtë i bindi drejtuesit që ta ofrojnë në ekipin e parë, ku në dy sezonet '85-'87 regjistroi 19 paraqitje dhe një gol.
Messina ishte skuadra e tij e ardhshme, ku në sezonin e vetëm shënoi 2 gola në 29 takime. Kulmin e golave e arriti te Cesena në sezonin 1991-1993, ku realizoi 25 gola në 74 paraqitje.
Por "qershia mbi tortë" u vendos kur Lerda ishte pjesë e Cuneo. Ai luajti për 4 sezone me skuadrën ku edhe u formua, duke regjistruar 115 takime dhe 73 gola. Karrierën e mbylli në sezonin 2002-2003, ku shënoi 11 herë në 21 takime me fanellën e Canavese.
Si trajner, ai e nisi karrierën te Saluzzo, duke i drejtuar për një sezon, nga viti 2005 deri në vitin 2006. Një sezon drejtoi edhe skuadra si Casale, Pescara, Pro Patria, Crotone dhe Torino.
Te Lecce ai drejtoi për 2 sezone, për tu ulur më pas në pankinën e Vicenza. Si futbollist, ai ka veshur në dy raste edhe fanellën e kombëtares U-21 të Italisë, ku shënoi edhe një gol.
Lexo gjithashtu
