Renato Malota është kapiteni që po ‘udhëheq’ Egnatian drejt performancave të shkëlqyera. Mbrojtësi cili u zgjodh në 11-shen më të mirë të vitit dhe i gjithë ekipi rrogozhinas po dhurojnë performanca të cilat e kanë dërguar Egnatian në vendin e parë të shkëputur me 5 pikë nga ndjekësi më i afërt që është Partizani.
Egnatia po e mbyll gjysmën e sezonit si kampion dimri, por luan nesër mbrëma në “Air Albania” për trofeun e parë, në ndeshjen e Superkupës përballë “Demave”.
Në një prononcim eksluziv për “Newsport.al”, është pikërisht kapiteni i Egnatias, Renato Malota që e quan Superkupën një ndeshje prestigji dhe ‘rrëmbimi’ i trofeut është arsyeja e futjes në fushë. 34-vjeçari gjithashtu shprehet shumë i lumtur që është zgjedhur në formacionin më të mirë të vitit dhe këtë vlerësim e sheh si një shtysë për tu përmirësuar.
“Ishte një kënaqësi për mua të zgjidhesha në formacionin më të mirë të vitit. Sepse e gjithë puna dhe sakrifica e këtij viti u shpërblyen në mënyrën më të mirë. Por kjo është edhe një shtysë që vitin që vjen të bëj më mirë.
Superkupa ndaj Partizanit? Padyshim është një ndeshje prestigji dhe normalisht futemi në fushë për ta fituar këtë trofe.
Pas Partizanit vjen Tirana. Ndeshja me Tiranën është një ndeshje radhe ku ne kërkojmë të marrim maksimumin. Vazhdimësia është shumë e rëndësishme dhe është kjo arsyeja jonë që çdo ndeshje futemi për të marrë maksimumin e për të bërë më të mirën në fushën e lojës.
Diferenca e pikëve? Ne dhe Partizani kemi krijuar shkëputje nga ekipet e tjera, por kurrsesi nuk vë në gjumë apo ul dëshirën tonë për të fituar. Është më e vështirë ta mbash vendin e parë sesa ta arrish atë. E dimë qe jemi ekipi për tu mundur, prandaj ne jemi me këmbë në tokë dhe çdo ndeshje e marrim si finale”, është shprehur Renato Malota.
/Nikoll Andrea Rajta/
Lexo gjithashtu
