Të shtunën është luajtur ndeshja mes Apolonisë dhe Vllaznisë e vlefshme për kampionatin e femrave. Sfida ka përfunduar me shifrat 0-1, por ajo që ka ndodhur në fushën e blertë i kalon tërësisht kufijtë e një gare sportive. Burime të besueshme tregojnë për Newsport.al që presioni ka qenë i madh gjatë gjithë ndeshjes nga presidentët e dy skuadrave ndaj gjyqtares kryesore Mirela Cemeri e kolegjiumit të Durrësit. Gjithçka ka nisur në përfundim të pjesës së parë.
Presidenti i vajzave shkodrane, Lazer Matija zbret në fushë dhe konfrontohet verbalisht me disa persona të gjendur në ambientet e stadiumit të Fierit. Të njëjtën gjë bën edhe ndaj gjyqtares Cemeri duke cënuar tërësisht imazhin e saj në një ndeshje të programuar vetëm si duel sportiv. Ndeshja ka tension dhe në minutën e 64-të të takimit, akordohet faull në favor të Vllaznisë ku ndëshkohet me karton të kuq lojtarja e Apolonisë, Liridona Gashi pas dy të verdhëve.
Në këtë moment, futbollistja e fierakëve nuk përmbahet por shkon të godasë arbitren. Janë lojtaret e tjera të ekipit të saj që neutralizojnë sulmin, ndërsa fjalët banale në drejtim të gjyqtares pritet ta kenë penalizuar më rëndë pasi sytë janë nga Komisioni i Disiplinës. Pikërisht në këtë moment, burime për Newsport.al tregojnë se ndodh e pabesueshme. Presidenti i Apolonisë, Koço Kokëdhima futet në fushën e blertë dhe i kërkon llogari gjyqtares. Por duke dashur të vendosë diktatin për sfidën, ajo nuk i kthen përgjigje dhe në këtë moment Kokëdhima nis të shajë. Veç kësaj, mësohet se kreu i fierakëve nuk e ka pasur emrin në protokollin e takimit.
Tashmë sytë janë nga Komisioni i Disiplinës që do të mblidhet ditën e nesërme. Gjasat janë që të dy presidentët, veç lojtares fierake, do të njihen me vendimet e drejtësisë sportive në vend. /Newsport.al/
Lexo gjithashtu
