Arti Seferi, shqiptari që ka mahnitur gjithë ndjekësit e këtij sporti, në një prononcim për newsport.al ka rrëfyer se si e nisi këtë pasion të tij, cilat ishin peripecitë që hasi rrugës dhe çfarë synon duke i premtuar gjithë bashkëkombësve të tij diçka për të ardhmen. Gjithashtu Seferi ka sugjeruar një mënyrë stërvitje për të gjithë ata që e kanë pasion Bodybuilding, për të arritur rezultatet e shumëpritura.
- Sa kohë keni që merreni me këtë sport dhe cilat kanë qenë vështirësitë e tij?
Me këtë sport merrem për gati 14 vjet. Vështirësia më e madhe është të rrish çdo ditë pozitiv për këtë sport dhe për të ndjek çdo gjë në mënyrë strikte për shumë vite, për të qenë i suksesshëm.
- Keni provuar të stërviteni në atdhe, ashtu si në Amerikë? Cili është ndryshimi?
Në atdhe nuk jam stërvitur asnjë herë. Kur kam ardhur në Amerikë kam qenë vetëm 16 vjeç. Që atëherë jam stërvitur këtu.
- Si është të jesh një builder në Amerikë?
Të jesh një builder në Amerikë, është një jetë shumë interesante. Mua më pëlqen shumë sepse je gjithë kohën i fokusuar në diçka dhe ke shumë njohje.
- Ju keni marrë pjesë në IFBB si profesionist, ç'vend keni zënë?
Unë kam marrë pjesë në IFBB (Federata Ndërkombëtare e Bodybuilding) në kategorinë profesioniste, plot shtatë herë brenda një viti, për kompeticionin 2015-2016. Vendin më të mirë që kam zënë ka qenë vendi i tetë.
- Disa këshilla për mënyrën e stërvitjes në palestër mund t'i japësh për gjithë shqiptarët?
Çdo njeri që fillon të ushtrohet në palestër për herë të parë, dashurohet shumë me peshën dhe mundohet që të ngrejnë sa më shumë pesha. Por sekreti më i madh i këtij sporti është mënyra se si e ekzekuton ushtrimin dhe jo se sa e rëndë është pesha.
- Cilat janë suplementet esenciale për një fillestar palestre?
Jo vetëm për fillestarë, por çdo njeri që merret me palestër, duhet të marrë disa suplemente ditë për ditë, për të cilat trupi ka nevojë. Vitaminat e përditshme si vaj peshku (Omega3), vitamina C, dhe multivitamins janë shumë të domosdoshme. Gjithashtu dhe proteina me BÇA-në. Ka edhe disa lloje të tjera, por këta që përmenda janë më të rëndësishmet.
- Ku do ta shohim Artin në të ardhmen?
Artin do ta shikoni në "Arnold Classic" në Amerikë, në Mars të vitit 2017, duke marrë pjesë në garat IFBB si profesionist.
- Ke diçka për t'i thënë bashkëkombësve të tu?
Ju përshëndes të gjithëve, çdo herë ndiqni ëndrrat që keni, dhe iu premtoj se do ta sjell fitoren botërore në Shqipërinë etnike. Gjithashtu i ftoj gjithë bashkëkombësit e mi të më ndjekin në faqen zyrtare në facebook "Arti Seferi IFBB pro", por edhe në instagram pasi mbështetja e tyre më motivon që të arrij majat në këtë sport.
- Pasi ke dalë kampion për dy vite me radhë në kategorinë fitness, cili është synimi i radhës?
Unë kam dalë kampion vetëm në garat e zhvilluara në Amerikë, pra për shtetin Amerikan. Synimi i radhës është të bëhem kampion Bote.
Lexo gjithashtu
