Është lindur në Strugë dhe tashmë po shkëlqen në Çeki me skuadrën e Slovackos B. Agon Hani, vetëm 19-vjeç dhe luan si mesfushor shkatërrues. Së fundmi ai ka marrë një ftesë nga përfaqësuesja e Maqedonisë, por ëndrra dhe dëshira e tij është të veshë fanelën e Shqipërisë. Këtë e thotë mjaft hapur dhe beson se në një të ardhme do të ketë një ftesë nga kombëtarja shqiptare.
Në një intervistë ekskluzive për newsport.al, Hani flet pa doreza duke thënë pa druajtje atë që mendon. Është në fillimet e tij, por cilësitë në fushë e bëjnë një lojtar të së ardhmes. Bën një analizë të shkurtër për kuqezinjtë, ndërsa për zgjedhjet e Federatës Shqiptare të Futbollit nuk preferon të japë një përgjigje. Këto e shumë të tjera mund t'i zbuloni në intervistën e mëposhtme duke njohur edhe djaloshin që deri më tani ka shënuar 1 gol në 10 ndeshje të luajtura.
- Agon përshëndetje! Si po shkon aventura futbollistike në Çeki?
Përshëndetje dhe iu falënderoj që më dhatë mundësinë të jem pjesë e kësaj interviste. Jam i lumtur, gjithçka po ecën mjaft mirë në Çeki. Në fillim e kishta të vështirë se këtu luhet një futboll më ndryshe se te ligat që kam qenë deri para kësaj.
- Për të gjithë ata që s'të njohin, ku i keni fillesat si lojtar?
Po e nis nga fillimi. (Qesh). Jam lindur në Strugë dhe futbollin e kam nisur me skuadrën e KF Veleshta. Më pas jam transferuar në klubin e FK Ohrid 2004 dhe më vonë luajta në Akademinë Pandev derisa mbusha 18 vjeç. Pas kësaj u transferova në Kroaci te skuadra e Novigradit, ku luajta për 6 muaj. Shfaqa cilësi të mira dhe ishte ekipi i Slovacko që më kërkoi në Çeki. Këtu jam shumë mirë dhe shumë i lumtur.
- Futbolli maqedonas ndryshon shumë me atë çek. Si ka ndikuar ky fakt në karrierën tënde?
Atje liga është më e dobët. Ndryshon shumë dhe siç e thashë më lart këtu futbolli është shumë fizik.
- Ju jeni vetëm 19-vjeç dhe karrierën tuaj e keni përpara. Cilat janë synimet e tua?
Unë po i marr gjërat një e nga një. Tanimë jam pjesë e përfaqësueses së Maqedonisë U-21. Sapo kam marrë ftesë.
- Në dijeninë time, ju dëshironi Shqipërinë. Pse kjo zgjedhje?
Të luash për Shqipërinë, është ëndërr që shpresoj të bëhet realitet shumë shpejt.
- Por, ti tashmë je bërë pjesë e Maqedonisë...
Luaj me Maqedoninë se nuk kam ftesë nga Kombëtarja e Shqipërisë. Nëse do të më jepej mundësia të zgjidhja mes Shqipërisë dhe Maqedonisë, sigurisht do të zgjidhja fanelën kuqezi. Jam dhe ndihem shqiptar.
- A nuk iu tremb kjo deklaratë?
Atë do ta thoshte çdo njeri që ndihet shqiptar. Për momentin jam te përfaqësuesja e Maqedonisë.
- "Për momentin" nënkupton që mund t'i bashkoheni shumë shpejt kuqezinjve?
Nuk e di. Unë jam i gatshëm për të ardhur te Shqipëria.
- Pse skuadrën e Maqedonisë e quan përfaqësuese, ndërsa ekipin e Shqipërisë Kombëtare?
Sepse kombi ynë është Shqipëria.
- Po Maqedonia çfarë është?
Është vendi ku jetoj. Por, kudo që do të luaj do të jap maksimumin. Nuk dua të keqkuptohet askush.
- Si të është dukur Kombëtarja shqiptare?
Më pëlqen. Bën një futboll të bukur dhe kjo falë punës së palodhur të trajnerëve.
- A beson se do të vijë shpejt ftesa?
Nëse punoj shumë, pse jo. Por, besoj se është herët për diçka të tillë.
- Pse thoni është herët?
Sepse duhet të jem realist dhe me këmbë në tokë. Kombëtarja e Shpresave ka lojtarë mjaft të përgatitur dhe mua më duhet të punoj shumë.
- Pra nuk ke besim në forcat e tua për të mposhtur konkurrencën?
Nuk e thashë kështu. S'dua të keqkuptohemi. Kur të jem gati, besoj se do të vijë dhe ftesa. Deri më tani çdo gjë e kam arritur me forcat e mia.
- A mendon se Federata Shqiptare e Futbollit bën zgjedhje të drejta?
Nuk kam një përgjigje për këtë. Nuk e di.
- Kush futbollist të pëlqen më shumë në Kombëtare?
Janë të gjithë të përkryer dhe ju uroj të gjithëve fat e suksese.
- Ç'mendim ke për ata futbollistë që refuzojnë kombëtaren shqiptare?
Çdo lojtar bën zgjedhjen e vet, sipas mendimit të tij. Futbolli është sport dhe gjithsecili vepron ashtu si e ndjen.
- Një përgjigje të sinqertë... Ç'mendon për Enis Bardhin?
Nuk e njoh personalisht. Nuk më pëlqen të jap një mendim për futbollistët e tjerë. Ai ka punuar shumë dhe punë e tij po shpërblehet.
- Diçka të fundit për të gjithë shqiptarët dhe të ardhmen tënde?
Do të ketë shumë shpejt lajme për të ardhmen time. Shpresoj të bëj krenarë të gjithë shqiptarët me arritjet e mia. /Retin TOKA/
Lexo gjithashtu
