Bylis i këtij sezoni po bën surprizën në Kategorinë Superiore, duke bërë që ndjekësit e futbollit t'i kushtojnë vëmendjen e duhur ekipit nga Ballshi. Mallakastriotët ndodhen në pozitën e parë të klasifikimit, duke bashkëkryesuar me Teutën, në kuotën e 11 pikëve. Një nga pikat më të forta të Bylis është grupi i futbollistëve dhe njohja që ata kanë nga sezoni i kaluar në Kategorinë e Parë.
Një ndër lojtarët kyç të këtij Bylisi është edhe Franklin Ntephe. Mesfushori nigerian që vetëm pak ditë më parë festoi ditëlindjen e tij të 26-të, ka zënë vend titullari në njëmbëdhjetëshen e trajnerit Dovedan. Ky është sezoni i tij i katërt në Ballsh, duke u aktivizuar në total plot 4851 minuta. Nigeriani i mesfushës ka zhvilluar gjithsej 69 paraqitje duke realizuar edhe 10 gola, 3 nga të cilët këtë edicion në Kategorinë Superiore. Në një intervistë për newsport.al ai tregon për formën sportive, marrëdhënien me trajnerin si edhe përshtatjen në një ambient të panjohur më parë.
-Ky është sezoni i katërt që ju luani me Bylisin.Si e gjetët veten në Ballsh ?
Po, ky është sezoni im i katërt me Bylisin. Unë nuk kisha dëgjuar dhe nuk kisha aspak njohuri për Shqipërinë. Mendoj se tre vitet e shkuara kanë qënë një përvojë e madhe për t'u ndierë komod tani. Unë kam ardhur nga Premier Liga e Irakut, konkretisht nga Baghdad Fc. Kam dashur gjithmonë ta shoh këtë si një sfidë, duke qënë më pranë futbollit europian që sigurisht është më i zhvilluar.
-A kishit dëgjuar për futbollin në Shqipëri dhe si ndiheni me këtë nivel ?
Futbolli këtu ka nivel të mirë dhe përshtatja duhet të jetë kryesore. Unë kam arritur të përshtaten shpejt, pasi edhe mbështetja nuk ka munguar. Jam duke e shijur lojën dhe jap më të mirën time gjithmonë.
-Jeni në krye të klasifikimit. A e ka ky ekip një sekret për këtë ecuri pozitive?
Eshtë e thjeshtë. Kur luani për Bylisin ju duhet ta dini se pavarësisht çdo gjëje ose kudo ku jeni duke luajtur, duhet të fitoni. Ky është sekreti nëse mund t'i themi kështu. Jemi ngjitur në Superligë me mentalitetin fitues të Kategorisë së Parë dhe kjo na ka ndihmuar shumë. I kemi marë gjërat hap pas hapi. Mos harrojmë se sezoni sapo ka nisur dhe ka shumë javë në përfundim. Duhet të jemi të qetë dhe të bëjmë çmos që të vazhdojmë formën e mirë. Qetësia dhe të pasurit e këmbëve në tokë do na bëjnë të vazhdojmë me rezultate të mira.
-Jeni një titullar fiks. Cfarë prisni nga ky ekip?
Personalisht pres më të mirën, qoftë në aspektin personal apo atë të skuadrës. Ekipi po bën përpjekje të vazhdueshme për t'u siguruar që të jemi brenda pritshmërive. Eshtë ende herët për të folur, por ne shpresojmë të jemi konkurentë të denjë.
-Dovedan ju beson "çelësat" e mesfushë, cila është marrëdhënia e trajnerit me ekipin?
Trajneri ka qenë këtu edhe sezonin e shkuar kur u shpallëm kampionë të Kategorisë së Parë dhe u ngjitëm në Superligë. Ai i njeh mjaft mirë aftësitë e gjithsecilit dhe merr më të mirën nga ne. Kemi një marrëdhënie fantastike, ai është si një baba për ne. Përpiqet t'i respektojë të gjithë duke mbajtur raporte të ngrohta me grupin.
-Në Ballsh e dashurojnë futbollin. Shumë lojtarë të mirë kanë dalë në atë qytet, ju a e shihni si një trampolinë për të kaluar ne një kampionat më të fortë ?
Eshtë e saktë, unë jam befasuar sesi jetohet futbolli këtu. Të gjithë të respektojnë dhe të bëjnë të ndihesh pjesë e rëndësishme. Përsa i përket të ardhmes, nëse nje lojtar dëshiron të lërë ekipin duhet të ketë konsensus me klubin duke pasur edhe respekt mes tyre.
-C'rol luan presidenti Kapllanaj në skuadër?
Të gjithë në Shqipëri besoj e dinë sesa presidenti ynë e do futbollin dhe kontributi i tij në ndërtimin e një skuadre kompetitive është i madh. Ai e bën me pasion këtë punë dhe ka plane të mëdha për Bylisin. Do që në të ardhmen Bylis të ketë ecuri të qëndrueshme.
-Të diel keni një përballje të vështirë përballë Laçit në transfertë. Si e prisni këtë duel ?
Javë pas jave presim ndeshje më të vështira, pasi ekipet tanimë e dinë forcën tonë. Do vazhdojmë të bëjmë punën tonë në mënyrë që të sigurojmë pikë në çdo ndeshje. E dimë qe me Laçin nuk do të jetë e lehtë, secila ndeshje ka vështirësitë e veta. Shpresoj që të dalim me pikë nga Laçi.
- Keni realizuar tre gola në gjashtë javë. Premtoni më shumë në aspektin personal ?
Tre gola nuk janë shume. Dua të punoj që me golat dhe lojën time të ndihmoj ekipin t'i afrohet objektivave sezonalë. Shpresoj që përpara gjysmës së sezonit të kem realizuar më shumë gola. Kështu qe çdo javë do jem duke punuar për këtë objektiv personal. / Stavro Dhimitri
Lexo gjithashtu
