Jemi në fundin e sezonit të futbollit në Shqipëri dhe tani më shumë se kurrë, tifozët e klubeve janë të interesuar për skuadrën e tyre, sa i takon arritjes së objektivave dhe të ardhmes së lojtarëve. Nëse ka një moment për të mos u tallur ose për të mos provokuar tifozët, është pikërisht tani.
Megjithatë, kjo gjë nuk e ka penguar Da Silvan të bëjë një postim kontradiktor në rrjetet e tij sociale. Braziliani i shënoi skuadrës së Egnatias ditën e djeshme. Këtë gol, e ka publikuar në “Story” në Instagram, duke i shtuar diçiturën: “Shumë i lumtur për fitoren, gjithashtu i lumtur edhe për golin që shënova në ndeshjen e fundit në “Loro Boriçi”. Ndoshta largohem, ndoshta”, shkroi Da Silva.
Vllaznia është një nga klubet më të mëdha në Shqipëri dhe është në një moment delikat të sezonit, pasi ka edhe një finale në Superiore kundër Kastriotit në transfertë, si dhe finalen e Kupës së Shqipërisë kundër Laçit. Në kampin shkodran, duken shumë të përqëndruar për të arritur objektivat e sezonit, ndërsa Da Silva gjen kohën për të treguar mungesë profesionalizmi.
Nuk është hera e parë që Da Silva ka qenë në qendër të vëmendjes nga mediat sportive në Shqipëri, pasi thuajse në çdo merkato, ka kërkuar të largohet nga Vllaznia, e më pas ka bërë prapakthehu. Ndoshta Da Silva duhet të përqëndrohet te ndeshjet e mbetura, jo të krijojë konfuzion për të ardhmen e tij në çdo mundësi që i jepet.
Lexo gjithashtu
