Në Vlorë gjithnjë situata ka qenë e ndezur për çështjet e futbollit. Sa më shumë të afrohesh me kampin kuqezi, aq më tepër kupton se ka shumë kontradikta, të cilat shpesh kanë çuar në largim trajnerësh, lojtarësh apo edhe personazhesh të tjerë të njohur.
Megjithatë, me Gugash Maganin pritet që kjo situatë të mos përsëritet. Peqinasi e njeh ambientin, pasi ka punuar në sezonin 2010-2011, kur e çoi Flamurtarin fare pranë titullit kampion, por për arsye që tashmë dihen, ky ekip nuk e ngriti dot trofeun.
Ditët e fundit lojtarët e huaj në Vlorë janë shtuar shumë, madje pa kriter. Ndoshta nga lajmi që ishte në pritje, rritja e numrit të të huajve, por edhe trysnia e menaxherëve që bashkëpunojnë me klubin. Mirëpo, së fundmi Magani po e redukton numrin e tyre, pasi nuk mund t'i aktivizojë do të gjithë.
Për këtë arsye kanë nisur dhe fërkimet në Vlorë, por që Magani ka vënë "veton" dhe nuk dëshiron që të ketë vendimmarrje pa lejen e tij. Disa futbollistë të huaj tashmë kanë firmosur direkt, pa dalë në provë, por më pas të tjerët u vendosën nën urdhrat e tij. Disa janë larguar, ndërsa pritet që numri total i të huajve të jetë pesë. Pra, pritet që të largohet dhe një.
Siç duket, vlonjatët kanë rënë dakord me punën e trajnerit, i cili deri më sot ka afruar në grup vetëm të rinj energjik, qoftë vlonjatë apo shqiptarë, të cilët duan që të lënë gjurmë në elitën e futbollit shqiptar.
Lexo gjithashtu
