Ish-kapiteni i Flamurtarit Tomislav Busic nuk është penduar për vendimin e vështirë të largimit nga kuqezinjtë në momentin më kritik të sezonit. Në një intervistë për Newsport, sulmuesi më i ri i Teutës zbuloi se arriti me mirëbesim me drejtuesit e klubit bregedetar të prishte kontratën dhe të shlyhej financiarisht për pagesat e pamarra deri në fund të muajit maj.
Ndër të tjera ai shton se ishte i gatshëm të qëndronte më shumë në Vlorë, por ndihma për familjen është gjëja më e rëndësishme në jetë dhe hir të saj bëra këtë sakrificë.
Ai flet me superlativa për Teutën duke theksuar se i ka të gjitha kushtet e një klubi serioz. Edhe pse ekipi durrsak është brenda objektivave, në zonën e tabelës që e çon në Europa League, kroati shtoi se përderisa në garë janë dhe 14 ndeshje, skuadra mund të tentojë të luftojë për titullin.
-Cila është përshtypja juaj për skuadrën e re Teutën?
Është pozitive. Teuta është një klub shumë i mirëorganizuar. Të gjithë njerëzit këtu më pranuan që në momentin e parë që nga presidenti, stafi teknik dhe lojtarët. Skuadra është shumë e mirë. Ka lojtarë të talentuar me potencial dhe lojtarë me shumë eksperiencë. Një ndërthurje shumë e mirë.
-Ndërruat së fundi ekip. Për sa kohë mund të arrini formën optimale pasi keni mbërritur në ditët e fundit të merkatos?
Po është e çuditshme. Erdha te Teuta në fund t përgatitjeve për gjysmën e dytë të sezonit dhe u dëmtova. Nuk u stërvita për dy javë dhe bëra vetëm 3 seanca stërvitore, por tani jam në rregull dhe së shpejti do të jem në formën time më të mirë.
-Çfarë ndryshimi gjen në të gjitha aspektet midis Teutës dhe Flamurtarit?
Ndryshimi është se Teuta është një skuadër e organizuar më mirë dhe ka të gjitha kushtet për një klub për të punuar dhe të marrë rezultatet e dëshiruara. Normalisht, dhe pagesat bëhen në kohën e duhur dhe këtu lojtarët mendojnë vetëm për stërvitjen dhe ndeshjet.
-A ndien një lloj rivaliteti me Amadu Latif, sepse jeni të dy golashënues?
Jo, nuk e ndiej fare. Jemi shokë dhe jam këtu për ta ndihmuar atë në fushë dhe ai mua. Duam të bëjmë mirë për ekipin. Dhe e di që do ta arrijmë së bashku këtë.
-Në ndeshjen e parë me Teutën, ish-shoku juaj Idriz Batha shënoi për Flamurtarin dhe ju provokoi duke ju kërkuar të festonit me të. A u ndiet keq?
(Qesh) Për Bathën mund të jetë e çuditshme, por unë nuk u ndjeva keq. Ky ësht futbollit, nuk ka shumë emocione pasi lë një ekip. Batha është një shok i mirë dhe nuk përbën asnjë problem kjo gjë.
-Përse zgjodhët Teutën? Kush ju bindi të firmosnit për ta?
Kam folur për të ardhmen vetëm me Teutën kur vendosa të largohesha nga Flamurtari. Teuta ishte zgjedhja ime e vetma që kisha për të bërë dhe kur dikujt i jap fjalën dhe bëjmë marrëveshje, nuk e thyej betimin.
-Ndërroni skuadër dhe qytet, por klima është e njëjtë. Kaq shumë ju pëlqen klima bregdetare?
Po, Durrësi është me të vërtetë një qytet i këndshëm. E dua klimën e tij. Jam shumë i lumtur që jam këtu.
-Si i zgjidhët problemet financiare me Flamurtarin? A jeni penduar që u larguat nga ekipi në një moment kaq të vështirë?
Me Flamurtarin bëra një marrëveshje për të prishur kontratën tani dhe të më paguajnë pagat e prapambetura deri në maj. Ësshtë e çuditshme të largohesha nga Flamurtari, sepse kalova dy vite e gjysmë atje dhe isha kapiten i ekipit dhe për këtë gjë jam shumë krenar. Isha gati të qëndroja më shumë atje, por kjo është jeta dhe futbolli. Në atë moment duhet të mendoja për familjen time, sepse ajo vjen e para. Vlora do të jetë gjithmonë në zemrën time i uroj ekipit më të mirën.
-Pyetja e fundit. Mendoni se Teuta këtë sezon mund të arrijë të ngre trofeun e kampionatit? Apo arritja e kualifikimit për në Europa League është objektiv që ju mjafton?
Ne kemi objektivin tonë Europën, por normalisht, nëse kemi shanse të sulmojmë Partizanin, ne do të përpiqemi ta arrijmë këtë. Përse jo, kemi dhe 14 ndeshje. Gjithashtu, shpresojmë t'i shkojmë deri në fund Kupës së Shqipërisë. Do të bëjmë gjithçka për të. /Dario Velaj/.
Lexo gjithashtu
