Tirana luajti dhe u kualifikua dje në Kupën e Shqipërisë duke barazuar 2-2 me Veleçikun. Në ndeshjen e parë, bardheblutë kishin triumfuar 3-0 dhe ky rezultat i çoi në raundin pasardhës.
Trajneri Orges Shehi hodhi në fushë lojtarët më me pak minuta në kampionat. Realf Zhivanaj ishte njeriu i ndeshjes për bardheblutë duke realizuar të dy golat. Pas takimit, qendërmbrojtësi tropojan ka folur për mediet duke treguar haptazi gëzimin e tij.
"Mendoj dhe besoj se treguam pak mungesë impenjimi në fillim të ndeshjes. Por, rikuperuam në pjesën e dytë. Personalisht jam i kënaqur. Kjo është detyra ime, të luaj, të shënoj dhe t'i shërbej skuadrës. Më ka peshuar ai karton me Vllazninë.
I ndodh çdo mbrojtësi. I ndodhi Tomorit pak orë më parë. Është normale. Sa për pozicionin, mund të luaj si në mbrojtje ashtu dhe në mesfushë. I bëj të dyja rolet. Mjafton që trajneri të më japë besim.
Në Ballsh do të luajmë për të marrë maksimumin. Na mungojnë 3 pikët ndaj Laçit dhe do të bëjmë gjithçka për të marrë maksimumin", ka thënë ai.
Në turin e dytë të Kupës së Shqipërisë, Tirana do të përballet me Lushnjën e Klodian Duros. Në letër shihen si favoritë, megjithatë vetëm fusha do ta vendosë se cili ekip shkon më tej.
Lexo gjithashtu
