Sot, në ambientet e Federatës Shqiptare të Futbollit janë mbledhur të gjithë presidentët e klubeve të Superiores. Burime për newsport.al ka treguar që ka qenë zëvendës presidenti i FSHF-së, Edvin Libohova ai që ka mbledhur në tryezën e përbashkët krerët e klubeve. Takimi ka pasur të bëjë me Ligjin e Sporteve, drafti i së cilit është çuar në parlament, ku pritet edhe implementimi i tij.
Qeveria ende s'e ka miratuar pasi ka bërë disa ndryshime. Me ndryshimet e fundit duhet të njiheshin edhe krerët e klubeve, ndaj zëvendës presidenti Libohova ka organizuar një tryezë të përbashkët, ku është diskutuar gjatë në lidhje me përfitimet nga ky ligj.
I kontaktuar nga newsport.al, Libohova ka treguar se nuk është vendosur asgjë pasi takimi do të vijojë të mërkurën e ardhshme, nga ku pritet të ketë një verdikt përfundimtar. "Është diskutuar sot mbi ndryshimet që përmban paketa ligjore për sportin, që është çuar edhe në Kuvend. Takimi do të vazhdojë ditën e mërkurë për të dalë në një qëndrim unik të Ligës", ka deklaruar Edvin Libohova.
Siç u raportua ditën e djeshme, qeveria ka marrë përsipër të rimbursojë 30 përqind të tatimit, por me një kleçkë. Kjo do të ndodhë vetëm për ata klube apo sportistë që kanë mbi 1 miliardë lekë (të vjetër) fitime.
Lexo gjithashtu
