Refik Halili është i ftuar në emisionin “Skaner” të Gerti Çarçanit. Presidenti i Tiranës analizoi skuadrën bardheblu deri në këtë fazë të kampionatit. Me meritë janë në krye të Superiores, megjithatë kreu i klubit kërkon edhe pak kohë që ekipi të shkojë në formën që pretendon.
Edhe pse rivaliteti është i madh, Halili thekson se kampionët do të shkojnë sërish drejt titullit në fund. Ai zbuloi se po tenton të marrë lejen për të ndërtuar një hotel pranë kompleksit “Skënder Halili. U ndal dhe të lojtarët që janë larguar në merkaton e verës, për të cilët tha se ishin më të dobëtit. Në fjalën e tij në panelin e emisionit sportiv, presidenti Refik Halili u shpreh:
“Unë nuk gaboj për gjendjen e Tiranës sepse shikoj djemtë e skuadrës. Ekipi që doli kampion ishte shumë i mirë. Kemi bërë ndeshje shumë të mira, i kemi përgëzuar të gjithë ata që kanë qenë. Sa i përket skuadrës që kemi sot, ka kualitet brenda. Sa i përket ecurisë s’jam i kënaqur sepse vjet kemi pasur ecuri më të mirë. Ditët e fundit kanë ardhur Delia, Patrick. Kjo skuadër do edhe pak kohë për të shkuar dhe për të marrë gati 20 pikë në çdo fazë. Shpresoj që ekipi të shkojë në nivelin e duhur në këtë periudhë minifaze që do të kemi.
Tirana bën diferencë me të tjerat? Unë dua të flas për skuadrën time. Mendoj që ka lojtarë shumë të mirë. Mendoj që ky ekip do të jetë pretendent për të shkuar drejt titullit. Edhe ne e kemi dëshirën për të shkuar drejt trofeut. Ka shumë ndeshje, ka shumë konkurrencë. Ishim 4 pikë pas Partizanit dhe arritëm të shkonim 2 pikë më lart. Duhet të kemi kujdes sepse të gjitha skuadrat janë aty. Ekipet duhet t’i marrin ndeshjet një nga një.
Shkëputja? Unë them për veten time dhe jam i sigurtë që kjo skuadër do të shënojë shumë. Pastaj do të shohim për merkaton që s’mund të flasim. Kur të vijë ajo periudhë do të flasim edhe më saktë. Skuadra mbron më mirë dhe bën më kujdes. Kontigjenti i lojtarëve s’është ai nivel që ka qenë vjet. Ka goxha prurje të mira, ka goxha nivel të mirë.
Rivali? Skuadra është goxha mirë. Është shumë e kompletuar. Ne duhet të bëjmë shumë gjëra. Duhet të kemi një hotel, një godinë tonën. Kemi punuar në drejtimin e infrastrukturës. Do të ishte shumë mirë të kishim klubin aty ku bëhet stërvitja.
Infrastruktura? Kemi pak vështirësi. Shpresoj t’i zgjidhim shumë shpejt. Është ndryshe nga klubi i Partizanit sepse ne kemi ortak. Duhet të marrim lejen e ndërtimit. Është klub që i plotëson të gjitha kushtet sipas standarteve europiane.
Lojtarët e larguar në merkato? Nëse flasim për Kupat e Europës që ne morëm pjesë, unë kam parë në fakt që jemi shqetësuar shumë që nuk shkuam më lart. Menaxherë të ndryshëm patën kërkesa për Totren dhe Tolin. Unë po ta them popullorshe siç jam mësuar të flasim. Lojtarët e larguar nuk bënë asgjë. Në Champions League ishin më të dobët, qoftë edhe Limaj që ishte jashtë forme. Kemi parë që nuk kemi qenë mirë. Ndoshta prindërit i kanë thënë mos u lodh që të luash diku tjetër dhe të rregullosh familjen. Mua nuk më mban fare kontrata, por biseda që bëjmë me futbollistët. Duhet të kishim punuar më mirë me lojtarët që donin të largoheshin. S’jam fare i penduar, jemi klub që shohim me kujdes në merkato. Nuk duam të mbajmë futbollistë mezor. U largua Seferi, afruam Hasanin. Afruam Deliun dhe Kallakun. Kemi larguar lojtarë, por edhe kemi marrë. Nuk është se kemi krijuar ndonjë boshllëk të madh. Në janar është e vështirë, por të jemi të kujdesshëm për të bërë blerje.
A ka nevojë për merkaton? Trajnerët kanë kërkesën dhe thonë që sa më shumë lojtarë të jenë, aq më mirë. Sikur të marrim lojtarë të tjerë, na bëhet një konkurrencë më e fortë. Kjo skuadër do të jetë pretendente kryesore për të shkuar drejt titullit.
Orges Shehi? Stafi siç po punon, shpresoj që të ecë dhe të vazhdojë punën. Nuk do t’i largoj, veç nëse duan të largohen vetë. Kur humbëm ndeshjen në Bosnjë, Shehi ishte i shqetësuar. Më kërkoi një takim në darkë. Zbrita dhe e takova, në fytyrën e tij ishte shumë i shqetësuar, sikurse njeriu kur mërzitet. Mori përgjegjësitë dhe më tha që dua të largohem. Kemi folur 5 minuta dhe e kemi mbyllur bisedën. Kam parë gjëra që më kanë pëlqyer. Kam besim se në drejtimin e tij skuadra do të ecë. Jam i bindur që Shehi do të mbyllë kampionatin pa problem fare. Kemi një staf goxha të mirë. Kosta është çelësi ynë i skuadrës. Kemi drejtorin që e kemi goxha të aftë. Tjetër gjë ka qenë kur ka qenë sportist, tjetër gjë tani. Kam besim se do të ecë shumë”, tha ai.
Lexo gjithashtu
