Refik Halili ka qenë i ftuar në emisionin "Top Talk" në Top-Channel ku ka folur me detaje për atë që ka ndodhur në derbin Tirana - Partizani. Kreu i bardhebluve preku gjithçka, ndërsa nënvizoi faktin se të ashtëquajturat "Bomba artizanale" kanë qenë vetëm disa tymuese.
Theksoi se është i gatshëm të vihet përpara përgjegjësisë nëse rezulton ndryshe, ndërkohë që kërkoi publikisht t'i kërkohet falje nga Partizani pasi kishte plotësuar çdo gjë për kampionët e Shqipërisë.
- Çfarë ishin ato mjetet piroteknike zoti Halili?
E kanë fryrë shumë dhe do të shikojmë në fund se ato kanë qenë tymuese. Drejtori i stadiumit ka thënë në mbledhje ka thënë: Duhet të marrim masa. Ka shkuar vetë ai dhe ka këputur kabullin. Mos të harrojmë se tifozët e Partizanit kanë shkatërruar 180 stola. Megjithatë janë tifozë. Për herë të parë pas 29 vitesh, vendoset një orë, një foni për të vlerësuar këtë ndeshje të rëndësishme. Më kanë thënë se pse fonia është pranë tifozëve tanë. Olsi Rama ka qenë shumë i saktë mbrëmë në emision.
- A keni një ide për të shmangur këtë që ndodhi?
Kam folur me një nga drejtuesit kryesorë të policisë së Tiranës dhe i kam thënë që këto shuma t'ia paguajmë policëve. Nëse policët do të ishin, s'do të ndodhte ajo. As 500 stjuartë s'do ta bëjnë dot. Vetëm policia e vë rendin dhe qetësinë në stadium.
- Protagonizmi po prish garën?
Policia e shtetit ka në gjitha tribunat ka njerëz të tyre dhe i dijnë shumë mirë. Nëse flasim për pak orë, policia merr drejtuesin dhe e zgjidh në dorë të tyre. Kjo iu la në dorë në stjuartëve dhe u bë gabim. Në stadiumin kombëtar s'ka rrethim dhe atje do të ndodhë nëse s'bëhet ligji. Ligji është shumë i rëndësishëm për ta ndaluar këtë.
- A po e dëmton politika sportin?
Njerëzit e politikës bëjnë mirë që vijnë në stadium, por le të vijnë si tifozë. Mos ta përziejë sportin me politikën. Unë shoh klubin, ekipin dhe tifozërinë më të zjarrtë. Nuk mundet që për 10 veta apo 15 veta të prishet, policia ka mundësinë të marrë masat e menjëhershme.
- A prodhon dhunë klubi i Tiranës?
Brezat e mëparshme kanë qenë shumë më të kujdesshëm. Ata janë rritur ndjeshëm. Fanela e Tiranës është fanelë nderi. Gjërat kanë ndryshuar në demokraci. Në drejtimin e klubit jam munduar të bëj diçka për klubin. Ju e keni parë që nga një gërmadhë, "Selman Stërmasin" e shndërrova në stadium. Brezi i fëmijëve tanë, po e kthejnë në luftë në rrjetet sociale. S'e di ça thotë njëri, e ça thotë tjetri.
- A duhet të emëtojnë klubet një frymë tjetër kundër racizmit?
Unë jam i bindur në 10 mijë tifozë që ishin në stadium, jam kundër 2-3 tifozëve që kanë qenë pro asaj koreografie. Jemi kundër dhunës. Absolutisht s'mund të përbaltim ata që kanë qenë në stadium.
- A i druheni vendimit të Disiplinës?
Unë jam për një dënim, që mos të dënohet e gjithë tifozëria jonë. Ka shembull në botë që dënohen grupime ose sektorë të ndryshëm të stadiumit. Shpresoj që të ndodhë kjo.
- Çfarë iu tha Armand Duka?
Kur kam ndeshje si kjo e derbit, më kapin ethet përpara. E kam parë në shtëpi se çfarë ka ndodhur. Me Dukën jam takuar duke hyrë në stadium. I thashë se ndodhi diçka sot, s'e di a e pe ose jo. Edhe ai s'e kishte parë. Presidenti është pak i ftohtë, është i qetë. Ai nuk shprehet. Mbledh argumenta dhe më pas vepron.
- A keni diçka për t'i thënë të gjithë atyre që ishin në stadium?
Më vjen keq për çdo njeri që është dëmtuar, për ata që kanë ardhur për të parë një ndeshje dhe marrin dhunë të tmerrshme. Kemi parë disa të gjakosur. Keqardhje shumë e madhe. Ata duhet të më kërkojnë falje mua sepse i kemi plotësuar çdo gjë. I kemi lënë Partizanit tribunën A, ku kam ngrënë të shara. Në bashkëpunim me tifozët e mi e bëmë këtë zgjedhje. I lamë këtë sektor për të mos u përplas. Në fund kam parë 2 gropa apo 3 gropa dhe iu them që ato janë tymuese. Nëse ajo do të ishte tritol, unë jam i gatshëm të vihem përpara përgjegjësisë. /Newsport.al/
