Mentor Mazrekaj është lojtari që po shkëlqen në këtë sezon futbollistik te Laçi. Fantazisti i ekipit kurbinas po bën mjaft mirë duke surprizuar të gjithë ata që ishin skeptikë për gjendjen e tij. 31-vjeçari nga Prishtina është në formë të jashtëzakonshme.
Për të ka folur, Shpëtim Duro që ka treguar prapaskenat e transferimit të tij në kampionatin shqiptar. I ftuar në Presing, trajneri i Laçit tregoi që Mazrekaj është pa rrogë te bardhezinjtë sepse kështu ishte dakordësuar me presidentin Laska për t'i dhënë një mundësi lojtarit që ishte në prag të lënies së futbollit.
"Mazrekaj ka ardhur te Laçi rastësisht. Unë kisha dëgjuar për të, ishte në prag të lënies së futbollit. Më vinte keq sepse e njoh mirë dhe e di çfarë lloj potenciali ka. Takova një ditë rastësisht presidentin Pashk Laska. I thashë: "Ma merr atë Mazrekajn në skuadër". Fillimisht u habit dhe më tha: "Çfarë thua o profesor?!".
"Ç'ke? Vetëm merre, do të jetë pa kosto..." Mazrekaj nuk dinte asigjë sepse s'kisha folur me të. U dakordësova me Pashkun që ta afronte pa asnjë lloj kosto në skuadër. Më pas telefonova Mazrekajn dhe më tha: "Profesor, po më bën një nder të madh. Jam gati të vij të luaj pa lekë. Dua të tregoj veten se kush jam".
Unë nuk ndërhyra për ta çuar te Laçi sepse do isha unë atje. Nuk e kisha menduar fare. Gjatë periudhës që ishte Cungu në krye, e shihja që Mazrekaj kishte gjendje. Por, kur e mora unë ekipin ai shpërtheu fare. Stërvitet shumë mirë dhe në fushë e keni parë vetë si është. Kjo më duhet mua. S'më pëlqen të flas për gjërat e tij jashte fushës. Nëse s'do t'i kishte pasur ato të tjerat, të jeni të bindur se ai sot do të ishte në një ekip të madh sepse është mjeshtër me topin", përfundoi Shpëtim Duro.
Lexo gjithashtu
