Christian Panuçi ka mbërritur mbrëmjen e djeshme në Tiranë për të qenë i pranishëm në eventin që organizon FSHF-ja si çdo vit. Pas mbërritjes në kryeqytet, për mokrofonin e "Top Channel", italiani i ka bërë një "skaner" Kombëtares shqiptare gjatë kohës që ai e ka drejtuar.
Ai ka zbuluar pengun që ka nga viti që për pak ditë lëmë pas dhe këtë herë e ka me Italinë, ndaj së cilës nuk arriti të marrë një fitore ashtu siç kishte dëshiruar tekniku.
"Mund të them që një nga pengjet e vitit që sapo u mbyll është një pikë që duhet të merrnim me Italinë dhe të them të vërtetën na mungon ajo në llogaritë përfundimtare. Për pjesën tjetër, dua të vazhdoj të theksoj që kemi bërë gjithmonë ndeshje shumë të mira, më ka mbetur mendja tek ndeshja me Italinë, por nuk na mbetet gjë tjetër tani, duhet të shohim përpara në të ardhmen. Viti i ri që po vjen do të fillojë menjëherë me përgatitjet për skuadrën. Nga muaji janar do t'i rikthehem udhëtimeve për të gjetur futbollistë të rinj që t'i kthehemi punës seriozisht", është shprehur italiani.
Për kualifikimin në Europianin e ardhëm Panuçi premton se do të ketë një riformatim të ekipit të Kombëtares pasi pritet që kuqezinjve tu bashkohet 3-4 futbollistë të rinj.
"Në këto 6 muaj që punoj me Shqipërinë kam arritur të ambientohem shumë mirë. Jam i bindur që do të kemi mundësi të bëjmë një skuadër shumë të mirë dhe në këtë mënyrë do të provojmë të shkojmë në finalet e Europianit e ardhshëm. Këto janë 6 muajt e parë që unë kam qenë këtu dhe mund të them që janë shumë të kënaqshëm sepse ndihem shumë mirë në detyrën e re në krye të kombëtares shqiptare. Dua të mbyll këtë vit me një urim për të gjithë tifozët shqiptarë. Gëzuar festat e fundvitit dhe i premtoj që do të punoj akoma më shumë në vitin e ardhshëm 2018, që të kemi mundësinë t'i dhurojmë emocione të mira me rezultatet tona", është shprehur Panuçi për mikrofonin e "Top Channel".
Lexo gjithashtu
