Presidenti i FSHF-së, Armand Duka, ishte i ftuar në emisionin ‘Opinion’ të Blendi Fevziur në KLAN TV ku foli për suksesin e Kombëtares shqiptare pas kualifikimit në Euro 2024.
Kreu i futbollit shqiptar tregoi emocionet e tij për këtë arritje, ndërsa zbulon edhe detaje nga bisedat e para me Sylvinhon para se ai të emërohej në krye të kuqezinjve. Gjithashtu, nuk mund t’i shmangej as pyetjes për Brojën duke sqaruar se nuk ka asgjë shqetësuese.
“Ky ka qenë edicioni më i mirë që ka bërë Kombëtarja Shqiptare, uroj që të kemi stabilitet në të ardhmen. Ka qenë më i mirë me rezultatet, gola të bukur. Do të ishte shumë mirë nëse do kishte fund të lumtur dje. Duke qenë se siguroi kualifikimin në Moldavi, nuk kanë hyrë me mentalitetin e duhur, me impenjimin e duhur që nuk ka skuadra të dobëta, e kanë menduar lehtë me një këmbë në festë, me mendjen totale në festë. Nuk mund të them nënvlerësim, por vetë ndjesia e brendshme për festën dhe e mendon shumë të lehtë atë ndeshje”, u shpreh fillimisht Duka.
Kur e pate për herë të parë ndjesinë që po shkojmë në Europian?
"Nuk është se themi kot por kemi besim në atë gjuhën popullore të futbollit thuhet rëndom nuk bëhen petulla me miell misri dhe këtu faktikisht ka miell gruri. Kemi talente, kemi futbollistë shumë të mirë, duke pasur një kontigjent të tillë padyshim që objektivi është të shkosh në një kompeticion si Europiani dhe Botërori."
Kur mendove që të shkosh?
"Qëkur kemi bërë marrëveshjen, madje ato kushtet apo marrëveshja që ka qenë me Misterin kur jemi takuar për herë të parë në Milano për të biseduar rreth këtij projekti ka qenë me objektiv për të shkuar në Europian."
E kishit objektivin që në fillim për të shkuar në Europian.
"Padyshim. Është bërë e ditur, projekti ka qenë për Europian. Duke pasur parasysh këtë skuadër, ndryshimin e kushteve në përgjithësi të skuadrës, objektiv por dihet që gjithmonë objektivi jo në 100% të rasteve realizohet, padyshim që duhet të prisnim shortin me kë do luanim, etj."
Nuk mendoj që ke pasur idenë që do ishte një rezultat i tillë dhe një skuadër e tillë, Shqipëri vetëm me një humbje dhe për mua, humbje e pamerituar me Poloninë se për mua është ndeshja më e mirë që ka bërë.
"Nëse do kthehemi në kohë kush ishin objektivat realë ose llogaritë reale që ne bënim, ishte që ne në dy ndeshjet e fundit të vinim në garë, të luanim në dy ndeshjet e fundit për të qenë një nga skuadrat fituese, i pari ose i dyti, me mendimin më shumë për vendin e dytë. Realisht bëmë akoma më shumë. Nuk e mendonim kurrë. Ne kemi marrë nga 4 pikë kundër gjithë skuadrave të grupit, përveç Polonisë që kemi marrë 3 pikë kurse kundër tre të tjerëve kemi marrë nga 4 pikë. Nuk kemi menduar që do shkojnë kaq mirë 80% e ndeshjeve sepse realisht, të paktën në mendimin tim, dy ndeshjet e fundit kurrë nuk e kam menduar që do marrim 2 pikë."
Nuk e kishe menduar?
"Minimumi 4. Prandaj dhe futbolli është i bukur se nuk është shkencë ekzakte, kurrë nuk mund ta parashikosh."
Kur e kuptuat që kishim një ekip realisht të mirë?
"Duke parë përbërjen e skuadrës, siç thatë ju që janë 7-8 futbollistë që aktivizohen në Seria A, futbollistë që aktivizohen në La Liga apo në ligën e parë turke apo qoftë edhe Broja në Angli që është një nga kampionatet sot më të forta të botës, pavarësisht siç ju e konsumuat, Broja nuk ka pasur mundësi që të kontribuojë."
Ka pasur mosmarrëveshje me Brojën nga Federata?
"Jo, jo në asnjë rast. Ai, siç e tha, siç e shohim të gjithë është një talent që nuk na vjen shpesh dhe ne nuk kemi luksin që ta humbim. Gjithashtu Duka falenderoi ekipin për punën e tij si dhe tifozët që kanë mbështetur kombëtaren edhe jashtë vendit."
Lexo gjithashtu
