Derbi Partizani - Tirana ka mbërthyer gjithë futbollin shqiptar si gjithmonë dhe me padurim presim nisjen e kësja ndeshje për të shijuar emocione që të dhuron vetëm një përballje e tillë. Dy skuadrat vijnë në një formë jo të mirë, megjithatë derbi është derbi dhe një fitore të zgjon edhe nga gjumi më i thellë e të ngre nga humnera më e errët.
Ish-mbrojtësi i Tiranës, Rezart Dabulla, në një intervistë ekskluzive për Newsport.al ka komentuar gjatë situatën e bardhebluve, problemet alarmante në mbrojtje si dhe shanset për titull. Dabulla e konsideron paradoks formatin Final Four, pasi edhe pse nuk është aspak dakord me formulën, mbetet e vemtja mënyrë që Tirana të dalë kampion.
-Si i sheh dy skuadrat para derbit?
Të dyja pakashumë janë njësoj nga mungesa e rezultateve që ata shpresonin edhe nga ana e euforisë. Janë të dyja njësoj, nuk kanë marrë maksimumin, nga ana emocionale i shoh të barabarta.
-Fitorja e fundit në derbi erdhi me 2 golat e Xhixhës, Xhixha iku mbeti Hasani, tani edhe ky ka ikur. Ku duhet të varet Tirana të premten dhe më tutje?
Momentalisht Tirana nuk ka lider në asnjë repart të vetin, e ka mungesë kryesore. Do të shpresoja të funksiononte grupi, lojtarët të bëhen bashkë duke qenë që kur ka derbi humbin diferencat mes skuadrave, bëhen të barabartë. Një skuadër edhe po të jetë dobët, në një ndeshje derbi dhuron maksimumin e vet.
Shpresoj që Tirana të gjejë forcën e saj, në derbit e fundit nuk është se ka bërë lojë të keqe. Pavarësisht se nuk ka arritur fitoren, loja ka qenë e mirë edhe kur dolën barazim në derbin e fundit. Ishte një lojë e kënaqshme, ishte më afër fitores sesa Partizani. Do të shpresoja të bënte të njëjtën lojë si derbi i fundit, por të mos pësojë gola.
Për fat të keq shënojmë kaq shumë gola, por pësojmë shumë ndaj nuk i kemi marrë piëkt e plota. Lider duhet të jetë skuadra tani, lojtarët duhet të dinë që luajnë përpara tifozëve të vet dhe dihet sa e rëndësishme është derbi kundër Partizanit për tifozët e Tiranës. Këtu e kam gjithë shpresën, skuadra të karikohet, të mendojë që luan para tifozëve dhe të fitojë derbin.
-Dy skuadrat vijnë në një formë të dobët, u bë kohë që si kemi parë të dyja kështu. A ka një favorit në letër?
Nuk shoh favorit në derbi, skuadrat janë aty-aty duke parë humorin dhe rezultatet e fundit. Në përgjithësi derbi nuk ka favorit, niset në mënyrë të barabartë dhe ka 3 rezultate.
-Orges Shehi si kundërshtar, avantazh apo disavantazh për Tiranën.
Mbase mund të themi se do të jetë një gjysëm hapi më shumë i Partizanit meqë ka trajner Shehin i cili ka qenë te Tirana dhe mund t’i njohë lojtarët e bardhebluve më mirë sesa Ahmataj ato të Partizanit. Vetëm këtë e shoh si një gjysëm avantazhi për Partizanin.
-Në kohën tuaj Tirana ishte e pathyeshme në mbrojtje, pse kjo e tanishmja pëson kaq shumë gola? Ç’mund të bëjë Ahmataj për ta ndryshuar?
Nuk është se do bëjë ndonjë gjë Ahmataj se ata lojtarë janë që në fillim. Disa janë të adaptuar, disa kanë bërë gabime individuale më shumë se ç’mund të bëjë një mbrojtje. Në shumë raste nuk kanë qenë të koordinuar reparti dhe normalisht është një mbrojtje e dobët. Po t’i marrësh si individë, janë lojtarë me të dhëna të mira secili, por bashkë nuk funksionojnë. Herë gabojnë individualisht, herë nga pakujdesia, herë në vendosje, herë gabon portieri. Kur bëhen shumë gabime të tilla e rëndojnë repartin, e bëjnë të duket si kullesë makaronash.
Po nuk ishte i kujdesshëm, po nuk pate një lider që të të orientojë kolegët ku duhet të vrapojnë e të mbyllin zonat, normalisht është e vështirë që të funksionojë mirë. Për fat të keq gjatë gjithë kësaj kohe nuk ka funksionuar absolutisht mirë, reparti më i dobët i Tiranës. Nuk e mbaj mend të ketë pësuar kaq gola sa këtë sezon, është katastrofë. Të shpresojmë se do të jenë në një ditë të mirë dhe të jenë në ditë të keqe sulmuesit e Partizanit për të mos pësuar ato gola që kemi pësuar. Tifozët e Tiranës duhet të gëzojnë, u bë disa derbi që vetëm mërzitemi.
Shpresoj të jetë momenti i duhur, por kjo arrihet në fushën e lojës duke u përpjekur duke i impenjuar, duke ndihmuar shoku-shokun, duke mos bërë gabime. Kjo nuk bëhet me deklarata dhe dëshirë, duhet dëshira të transformohet në mund dhe djersë, me gjak e me sakrificë në fushën e lojës dhe të arrihet rezultati. Dëshira mund të jetë e madhe në deklarata e intervista, por duhet protagonizëm në fushë, të kuptojnë rëndësinë e derbit, të shfaqin maksimumin e tyre e të bëjnë sa më pak gabime që të arrijmë ta fitojmë. Se sa do të realizohet duhet të presim ditën e premte. Të gjithë shpresojmë për mirë, por çdo gjë mund të ndodhi, derbi i ka të 3 rezultatet.
-Deri tani Tirana është ‘fshehur’ pas Final Four, por edhe kjo është në rrezik nga Dinamo.
Tirana u ndërtua për kampion dhe neve na entuziazmoi formimi i atij ekipi me emra që i kanë lënë një shije të mirë futbollit shqiptar, por një pjesë e tyre ka qenë jashtë forme. Shumë prej tyre kanë çeduar në fushë, nuk kam parë ndonjë këtë sezon që të shkëlqejë nga lojtarët që u afruan, nga senatorët. Nuk shoh ndonjë që po bën diferencën, ose ndonjë që grupi e tifozët kishin pritshmëritë maksimale ndaj tij. Shpresonim shumë te këto emra, por këto emra na kanë zhgënjyer me atë që kanë dhënë në fushën e lojës.
Po nuk vrapove, po nuk sakrifikove, po nuk ndihmove shokun, po nuk mendove për ndeshjen është e vështirë që në fund të dalësh kampion e të formosh një grup fitues. Pavarësisht se mund të kesh emrin e madh ose emrin e mirë le të themi se për të thënë emër të madh, Tirana ka patur lojtarë ku e ku, që kanë bërë diferencën në çdo lloj reparti, ka patur lojtarë me kualitet shumë të lartë. Nuk është çudi për Tiranën të ketë këta lloj lojtarësh, por në tregun që është formuar këto vite, këta lojtarë kanë qenë të mirë. Erdhën te Tirana si ekipi më i mirë i mundshëm për ta nxjerrë kampion, por për fat të keq një pjesë e tyre nuk kanë dhënë rendimentin e duhur dhe normalisht jemi kaq mbrapa me pikë.
-A do të jenë në gjendje bardheblutë të shkojnë drejt titullit?
Unë shpresoj, pasi derbi sheshon shumë gjëra, shpresoj që në derbi këta lojtarë të shfaqin vërtetë vlerat e tyre. E dyta është vërtetë ajo që thatë ju, skema e këtij kampionati që për mua është jo e përshtatshme, një skemë që zeron pikët dhe zhvlerëson atë që del në vendin e parë. Nuk mund të zerosh vendin e parë me vendin e katërt që mund të kenë 30 pikë diferencë e t'i quash të barabarta. është një skemë që vret garën, largon tifozët dhe për mua ka ndikuar keq te Tirana e skuadra të tjera. Ishin formuar për të dalë kampion dhe normalisht lojtarët mund të fshihen pas kësaj skeme duke thënë: S'ka problem po gabova disa ndeshje, jam prapë aty te katërshja dhe kam shansin tim në fund për të dalë kampion.
Më duket justifikim pasi lojtari duhet të jetë në maksimum çdo ndeshje, por ndodh që kur je dobët të thuash se kemi kohë të rikuperojmë edhe bëhen shumë ato rikuperimet e në fund je kaq pikë mbrapa. Në një kampionat normal, Tirana s'ka shanse të dalë kampion. është absurde të thuhet, edhe Tirana vetë nuk ishte dakord me skemën, as unë s'jam dakord me skemën, por skema është e vetmja mënyrë që skuadra të ketë shpresa për të dalë kampion. është një paradoks i madh që ia them edhe vetes këtë gjë që s'më pëlqen absolutisht kjo skemë, por është e vetmja mënyrë që Tirana të dalë kampion. Shpresoj, të presim si do të dalë deri në fund.
Dinamo është aty, 3 pikë larg nuk janë asgjë, duhet të bëjnë kujdes pasi po dolën nga katërshja do ta kenë të vështirë të rikthehet sërish. Duhet të bëjnë kujdes me ndeshjet që kanë, të japin maksimumin në fushë, të tregojnë seriozitetin e duhur e të vlerësojnë çdo kundërshtar. Mund të ndodhi edhe kjo lloj gjëmë që për mua do të ishte katastrofike, nuk e di çfarë emri t'i vë nëse Tirana nuk merr pjesë as në katërshe. Për mendimin tim, Tirana ka ekip më të mirë sesa Dinamo dhe nuk do ta vejë në diskutim deri në fund, por në futbollin shqiptar me këto që kemi parë, çdo gjë është e pranueshme, çdo gjë mund të bëjë vaki. Tirana po ishte aq idiote sa ta hedhi në erë sezonin me duart e veta... Nuk e di ç'të them, vetë ata e kanë në dorë, janë përpara me pikë, ndeshjet i kanë aty dhe nuk ka arsye pse ta vënë në diskutim. Por, nëse nuk impenjohesh çdo gjë vihet në diskutim.
//Gledi FEJZA
Lexo gjithashtu
