Bamir Topi ishte i ftuar mbrëmë në emisionin "Procesi Sportiv" në Top- Channel. Ish-presidenti i Republikës së Shqipërisë njihet si një tifoz i zjarrtë i 24-herë kampionëve të Shqipërisë, por kohët e fundit ai nuk është shfaqur më në shkallët e stadiumit. Topi analizoi situatën kritike të bardhebluve të cilët tashmë kanë rënë në një kategori më poshtë. Ai kritikoi ashpër politikën, ku sipas tij ka ndërhyrë keq në futboll.
Gjithashtu Topi si një mbështetës bardheblu i bëri thirrje të gjithë tifozëve të Tiranës të mos shohin vetëm hallet e tyre, por si dikur të bëhen bashkë për t'i lartësuar emrin kësaj skuadre embleme në futbollin shqiptar.
"Për mua, problemi i Tiranës në radhë të parë është politik. Më lejoni ta quaj Tirona. Së dyti, komuniteti është vyshkur, nuk ka më solidaritet, është shfrytëzuar nga politika dhe sot, pas 27 vitesh, kemi një Tiranë të themeluar në 1920 dhe që mbërrin në këtë dramë, sepse në Shkodër u ndeshën dy klubet themelues të futbollit shqiptar, që kanë furnizuar futbollin shqiptar dhe kombëtaren. Ndërkaq, kemi Kamzën, kemi Kukësin, por nuk kemi Besën, Elbasanin, Dinamon, tani edhe Tiranën.
Politika e ka marrë në qafë sportin shqiptar dhe Tiranën, mjafton të kujtohet çfarë kanë bërë kryebashkiakët e shkuar të Tiranës.
Tiranën duhet ta shpëtojnë tiranasit, jo politikanët. Në Shkodër pashë një solidaritet të jashtëzakonshëm, mijëra tifozë për Vllazninë, ndërsa nga krahu tjetër 30 tifozë të Tiranës. Nuk mundet ta menaxhojë një njeri i vetëm Tiranën, nuk është e mundur. Duhet një grup specialistësh, një grup donatorësh, një klub me shumë aksionerë. Tirana nuk duhet të jetë monopol, u bëj thirrje të gjithëve të dalin nga letargjia, të zgjohen e të mendojnë për Tiranën, sepse po e vrasim këtë klub. Nuk është problemi vetëm te presidenti aktual, ai merret me menaxhimin e klubit, por ka edhe probleme të tjera, politike. I them të gjithë tifozëve të Tiranës dhe sportdashësve normalë të vendit që asnjë skuadër futbolli mos prisni ta ngrejë Sali Berisha, Edi Rama dhe Lulzim Basha”, përfundoi Topi.
Ish presidenti i Shqipërisë kishte kritika edhe për drejtuesit, për mënyrën se si ishte menaxhuar skuadra në këtë edicion futbollistik.
Lexo gjithashtu
