Shqipëria fitoi mbrëmjen e djeshme përballë Polonisë me rezultatin e pastë 2-0 në stadiumin “Air Albania”. Një fitore shumë e rëndësishme që përveç vendit të parë që Kombëtarja jonë ka marrë, duket se jemi më pranë Europianit të Gjermanisë.
Pikërisht për këtë temë dhe mbi lojtarët e ftuar në Kombëtare ka folur presidenti i FSHF-së, Armando Duka në SYRI.TV.
NIVELI I EKIPIT - Nga niveli kualiteti, struktura dhe kushtet që ka skuadra mund të luajë me dinjitet dhe të fitojë ndeshjet. Jemi pretendentë për Europian dhe Botëror. Kemi përzgjedhur qendrën e grumbullimit për në Gjermani dhe uroj që mos të dështojmë. Nuk duhet të kemi eufori dhe të jemi me këmbë në tokë. Kam shumë besim tek ekipi, kam shumë besim tek stafi dhe kam shumë besim tek tifozët. Konkurenca sjell më shumë përkushtim dhe kualitet dhe kjo gjë është forcë për ekipin. Nuk e ke të sigurt që ke vendin në fushë apo në 23 lojtarët që do të përzgjidhen. Kemi shumë lojtarë me kualitet që nuk janë përdorur këto dy ndeshje, një gjë që nuk ka ndodhur kurrë në historinë e Kombëtares. Kemi Balliun, Mihaj, Muçi, por edhe Bare që u aktivizua shumë pak. Kemi shumë lojtarë të mirë edhe tek ekipi shpresa. Madje i’u uroj suksese për ndeshjen e nesërme ndaj Rumanisë.
FTESAT E KOMBËTARES - I bëj thirrje çdo shqiptari, dera është e hapur por nuk detyrojmë asnjë. Jemi e vetmja Kombëtare që nuk kemi nacionalitete të tjera dhe nuk e kemi as synim diçka të tillë. Kemi futbollistë të talentuar që kanë zgjedhur të luajnë për Kombëtaret e tjera. I kemi ftuar të gjithë, por kanë pasur dëshirë të luajnë për të tjerët.
REFUZIMET PËR SHQIPËRINË - E kemi ftuar Januzajn, jo vetëm ne, por disa Kombëtare. Faktikisht ka luajtur futboll në ekipe të mira. Ai zgjodhi të luante me Belgjikën dhe luajti pak me Kombëtaren. Unë mendoj që zgjedhja më e mirë është Shqipëria. Kam disa shembuj që nëse do të zgjidhnin Shqipërinë mund të bënin shumë më mirë në karrierën e tyre. Kënaqem që ka shumë kërkesa për të parë ekipin. Kënaqem që ka shumë kërkesa për të veshur fanellën e ekipit.
KËRKESAT PËR TË NDJEKUR KOMBËTAREN - Padyshim që shqiptarët mbështesin shumë futbollin dhe ajo çfarë dhuron ekipi në fushë ndaj kundërshtarëve në fushë dhe rezultateve pozitive kanë bërë që njerëzit të afrohen më shumë rreth ekipit Kombëtar.
KULLA E STADIUMIT - Çdo lloji kapaciteti i shtuar do të ishte i papërballueshëm për ndeshjen ndaj Polonisë, por do të jetë më shumë se kaq ndaj Çekisë. Kërkesat për ndeshjen e 12 tetorit kanë nisur që tani. Kulla nuk ka penguar që të shtohen shkallët në stadium. Ajo kullë nuk është bërë as me lekët e Edi Ramës apo të Federatës. Jemi stadiumi më i mirë në Rajon. Nga buxheti i shtetit kemi marrë 0 lekë. Është ndërtuar me biznes privat.
TIFOZËT - Nëse do të ishim pak më etik në stadium do të ishte më mirë. Nuk kemi pse të kemi flakadanë, pasi mund të vrasin njëri-tjetrin. Mund të ndodhin ngjarje skandaloze. Nuk duhej as të fishkëllehej himni i Çekisë. Ne me të vërtetë jemi ballkanas, por ballkanasit më të kulturuar të Ballkanit.
Lexo gjithashtu
