Vangjel Zguro ka bërë një reagim në rrjetet sociale, teksa “vorbulla” e mediave zien lidhur me një “përplasje” mes tij dhe trajnerit Emiljano Çela te Pogradeci.
Dyshja janë konfrontuar së bashku në javën që liqenorët janë duke u marrë me përgatitjet për ndeshjen e radhës në kampionat përballë Skënderbeut, dhe ky moment “tensioni” ngre shqetësime në një situatë ku duhet grupi i bashkuar për të vijuar punën drejt objektivit ngjitje në Superiore.
Për këtë arsye, vetë klubi ka vendosur të pezullojë pa afat liderin e skuadrës, ndërsa në anën tjetër Zguro ka zgjedhur që këtyre zhvillimeve t’u përgjigjet me një postim të bërë në Instagram.
Më saktë, 34-vjeçari ka rishpërndarë një post të vjetër që daton në 5 nëntor të vitit 2023, teksa këtë herë fotos i ka dhënë një tjetër ritëm duke i bashkangjitur hitin e reperit Noizy “Icon”. Ndoshta në këtë mënyrë, Zguro tregon se përtej gjithçkaje, ai është më i vendosur se kurrë për të çuar deri në fund misionin për të kthyer në elitë Pogradecin.
Lexo gjithashtu
