Kemi hyrë në vitin 2024 dhe juridikisht çdo futbollist që i skadon kontrata në qershor ka të drejtë të nënshkruajë një para-kontratë me një klub tjetër. Rregulli i FIFA-s për transferimet përcakton se një futbollist apo klub ka të drejtë të firmosë një marrëveshje paraprake me këdo lojtar që është në 6-mujorin e fundit të kontratës.
Në Superiore janë të shumtë futbollistët e tillë edhe prej faktit që kontrata bëhen afat-shkurtër në klubet vendase. Një vëzhgim i Newsport.al nxjerr në pah se aktualisht janë plot 25 të tillë që më 30 qershor 2024 do të jenë futbollistë të lirë nëse nuk rinovojnë me klubet e tyre.
Duke i renditur në futbollistët me vlerën më të shtrenjtë në treg, lista nis me gardianin e Egnatias, Alen Sherri, vijon me yje si Cara, Përgjoni, Sota, Kahrimanovic e përfundon me lojtarët me pak minuta si Bruno Gomes dhe Eogen Sula.
Klubi më i rrezikuar është Vllaznia me plot 5 lojtarë, 4 prej të cilëve janë titullar absolut: Esat Mala, Lorik Boshnjaku, Esin Hakaj, Marko Juric e Bruno Gomes janë lojtarët që shkodranët duhet të nisin negociatat së shpejti.
Egnatia veç Sherrit kanë edhe liderët e mbrojtjes Fangaj e Malota në skadencë kontrate, ndërsa nga stoli është edhe Bledar Lila.
Tirana është në 6-mujorin e fundit me 2 nga 4 mbrojtësat më të mirë të Superiores si Florjan Përgjoni dhe kapitenin Filip Najdovski, ndërsa Ardit Hila pritet të largohet që në këtë sesion merkatoje.
Te Partizani çështje në tryezë është Tedi Cara dhe Eljon Sota. I pari është objekt merkatoje që në verë, ndërsa mbrojtësi është kthyer në lider dhe prezenca e tij në prapavijë është jetike. Kapiteni Murataj është gjithashtu në fund të kontratës, por drejtori Abilaliaj ka konfirmuar se palët janë shumë pranë akordit. Një tjetër titullar është edhe Gjelbrim Taipi, por mbetet të shihet vendimi i drejtuesve. Nga të rinjtë, është Leart Zekolli që së shpejti pritet të rinovojë gjithashtu.
Emra të tjerë në listë janë Realdo Fili i Teutës, dyshja e Erzenit, Kahrimanovic e Sadiki; Ardit Nikaj e Gresild Lika të Skënderbeut, si dhe Patrik Bardhi e Bekim Rexhepi të Dinamos.
Lexo gjithashtu
