Emocionet e derbit të kryeqytetit prej ditësh kanë përfshirë gjithë tifozët. Të premten në “Air Albania” në orën 19:00 do të vihen përballë njëra-tjetrës dy ekipet më me rivalitet në kampionatin shqiptar.
Partizani pret Tiranën në një duel mjaft të luftuar dhe që do të jetë spektakël si në fushë edhe në shkallët e stadiumit. Renato Arapi ishte një nga protagonistët në Superiore si lojtar dhe si trajner. 37-vjeçari ka folur për superndeshjen e kësaj jave, ndërsa tregon edhe favoritin dhe kush do të vendosë këtë duel. Ndjen keqardhje që nuk pati fatin të provonte emocionet e derbit në fushë pavarësisht se mbajti veshur fanelën e kuqe.
Për “Newsport.al”, Arapi theksoi se shikon Partizanin favorit pasi Orges Shehi e njeh deri në “rrënjë” Tiranën dhe ua di pikat e dobëta dhe të forta të tyre. Si një durrsak dha komentin e tij mbi situatën në të cilën ndodhet Teuta.
- A vazhdoni akoma karrierën te Ohod Club, çfarë mund të na thoni për aventurën tuaj në Arabi? - Në fakt u bë disa muaj që nuk jam më pjesë e e klubit Ohod. Për shkak të disa ndryshimeve që ndodhën në klub vendosëm me mirëkuptim të ndajmë rrugët.
- Nga trajner te Teuta në ndihmëstrajner në Arabi, pse kjo zgjedhje? - Arsyeja pse unë pranova të shkoja zëvendëstrajner në Arabi ishte se doja një eksperiencë të re në një ligë të re. Kjo e fundit po zhvillohet me hapa galopant. Një tjetër arsye ishte padiksutim edhe Ernest Gjoka, i cili ishte trajneri i parë që provoi të drejtojë në Arabi. Sigurisht unë jam i ri në këtë zanat dhe akoma kam shumë gjëra për të mësuar dhe për të përmirësuar. Duke qenë që profesor Nestin e njoh nga ana profesionale dhe e di mënyrën se si punon mendova se ishte një shans i mirë për mua për të fituar akoma më shumë eksperiencë.
- Me çfarë po merret aktualisht Arapi? - Aktualisht nuk jam i aktivizuar në ndonjë vend, le të themi sa i përket sportit. Normalisht dua të përfundoj kursin e UEFA-s dhe më pas do të shikojë të gjitha alternativat dhe mundësitë që kam.
- Kthehemi të flasim për futbollin shqiptar, a e ka ndjekur Arapi Superioren këtë sezon? - Jam munduar ta ndjek, por jo gjithmonë kam mundur të shikoj të gjitha ndeshjet. Kjo e gjitha për shkak të angazhimeve dhe impenjimeve që kam.
- Jemi para derbit të kryeqytetit Partiani – Tirana, si e parashikoni këtë sfidë? - Një ndeshje e luftuar, ku impenjimi është maksimal. Tifozeritë e të dyja ekipeve janë aty për përkrahjen maksimale për skuadrën e tyre, të cilët ndikojnë edhe në performancën e lojtarëve. Është një ndeshje që edhe futbollistët që luajnë dalin nga detyrat e tyre, pasi përfshihen nga emocionet. Arsye këto që e bëjnë të vështirë të parashikosh një derbi.
- Sipas jush cilat janë arsyet që dy ekipet kryeqytetase kanë oshilacione në këtë sezon? - Unë mendoj se lëvizjet e shpeshta të trajnerëve dhe lojtarëve bëjnë që ekipet të kenë oshilacione. Duhet që klubet t’u japin më shumë besim trajerëve që këto të fundit të implementojnë idetë e tyre dhe sigurisht që kjo të merr pak kohë.
- E njihni personalisht Shehin në kohën kur luanit sëbashku te Skënderbeut. A do t’ia dalë të fitojë ndaj ish-skuadrës? - Sigurisht që Shehi ka qenë një ndër shokët dhe kolegët e mi më të mirë që kisha te Skënderbeu. Është një person i përgatirur dhe një person me këmbë në tokë dhe njëkohësisht një trajner që përkushtohet shumë. Favori i Shehit në këtë ndeshje është që pjesën më të madhe të lojtarëve që aktualisht janë te Tirana i ka stërvitur dhe ua di pikat e forta dhe të dobëta të tyre.
- Keni provuar të mbani veshur fanelën e Partizanit, tani që po flasim për derbin, çfarë emocionesh ju jep? - Fatkeqësisht nuk e kam provuar të luaj derbin kundër Tiranës, pasi unë kam luajtur në Kupat e Europës me Partizanin dhe më pas u transferova në Turqi.
- Partizani apo Tirana? - Kësaj pyetjeje në fakt nuk mund t’i përgjigjet askush. Asnjë nuk është i zoti të bëjë një parashikim të saktë duke qenë se derbi është derbi dhe është gjithmonë i luftuar. Por për arsyet që theksova më lart shikoj më të favorizuar Partizanin, pasi Shehi i njeh në “rrënjë” kundërshtarët.
- Kush e vendos këtë sfidë dhe sa del rezultati? - E vështirë të japësh parashikime, por duke qenë se e shikoj Partizanin si favorit këtë ndeshje mendoj se e vendos Tedi Cara.
- Çfarë mendoni për “Final – Four”? - Është një skemë e re që po testohet këtë sezon, kun ë fakt ka edhe liga të tjera që e përdorin këtë lloj skeme. Për mendimin tim duhet të presim fundin e kampionatit për t ëdhënë një mendim të saktë për “Final – Four”.
- Teuta endet në fundin e klasifikimit, a do t’ia dalin durrsakët të mbijetojnë në këtë sezon? - Teuta gjithmonë ka patur oshilacione dhe e ka nisur kampionatin me marshin jot ë duhur. Kjo për shkak të ndryshimeve që janë bërë gjithmonë në fillim të sezonit. Gjithmonë në fazën e dytë të kampionatit ka bërë shumë herë më mirë se në dy fazat e para. Në fazën e dytë ka rikuperuar pikë të rëndësishme, gjë e cila sigurisht rrit edhe besimin dhe entuziazmin në ekip dhe kjo do t;iu shërbejë për t’u përballur siç duhet në ndeshjet që u kanë mbetur./ Floridona ADEMAJ/
Poll
Lexo gjithashtu
