Kastrioti po kryeson bindshëm në Kategorinë e Parë në grupin A. Krutanët shikohen si pretendenti kryesor për tu ngjitur në Superligë sezonin tjetër dhe për këtë një meritë të veçantë ka edhe trajneri i ekipit, Samuel Nikaj. Për Newsport.al, Nikaj ndalet dhe flet për ekipin e tij por nuk harron as Superligën dhe ish-ekipin e tij Vllazninë.
-Kryesoni bindshëm në grupin A të Kategorisë së Parë. Do e mbyllë Kastrioti çështjen "Superligë" që në fazën e dytë ?
Të themi të vërtetën është se formula e kampionatit nuk na lë shumë hapësirë për t'u gëzuar. Por ne duhet të jemi me këmbë në tokë dhe të punojmë sa më shumë që të arrijmë objektivin.
-Kë shikoni si rivalin më të fortë në këtë kampionat ?
Si rival më të fortë shoh vetëm vetveten. Kjo sepse mund të kalojmë në një eufori që mund të na dëmtojë shumë dhe që është një "sëmundje" e vjetër e ekipeve shqiptare. Po punuam me këto ritme mendoj se jemi një hap para të tjerëve.
- Do kërkoni përforcime në janar apo ekipi është i plotë për të përballuar një kampionat të tillë ?
Në filozofinë time të ndërtimit të një ekipi nuk ka vend për "yje" por për një grup solid. Nuk dua asnjë hapësirë të madhe lojtarësh. Në merkato mund të operojmë maksimumi me një ose dy lojtarë cilësorë.
- Keni pësuar vetëm 4 gola në këtë kampionat deri më tani. Mos është në mentalitetin tuaj që në fillim të mos pësoni pastaj të shënoni ?
Nuk është rastësi se në çdo ekip ku kam drejtuar, ekipi ka pësuar shumë pak gola. Madje njëherë jam shkarkuar nga një president që më akuzonte për lojë mbrojtëse. Por unë thjesht dua të ekipi të jetë në ekuilibra për 90 minuta.
- Deri më tani nuk keni pësuar asnjë humbje. Premtoni se do e mbyllni me rekord këtë kampionat ?
Nuk është në natyrën time të bëj premtime. Premtimi im i vetëm është puna për të arritur te suksesi në fund.
- Për t'u kthyer pak te Superliga. Si e shikon Nikaj këtë vit kampionatin dhe kë shikon si pretendentin kryesor ?
Ky kampionat po më tregon mua dhe të gjithëve një Skënderbe i cili është disa shkallë sipër të tjerëve. Jam suprizuar për mirë nga Flamurtari dhe për keq nga ekipet e Vllaznisë dhe Partizanit.
-Ju keni reaguar së fundmi edhe për situatën te Vllaznia. Ç'mund të na thoni më tepër ?
Për Vllazninë dua të përdor një shprehje të një mikut tim: "Është bërë si torta e pavarësisë ku çdokush mundohet që të kapë nga një copë të madhe e dikush më të vogël". Më vjen keq që është në këtë situatë ku harxhohen 1 milionë euro dhe ekipi përfundon duke luajtur për mbijetesë.
- A do e shikojmë Nikajn në Superligë vitin tjetër ku ju edhe keni trajnuar në të shkuarën ?
Në Superilgë kam drejtuar 5 ndeshje Vllazninë dhe 8 ndeshje ekipin e Tërbunit por nuk kam plane konkrete. Unë thjesht dua futbollin dhe jam i gatshëm të punoj në çdo nivel duke filluar nga U-19, Kategoria I apo II apo edhe Superliga. Mjafton që projektet e ekipeve të jenë projekte që të më bindin. /Endri ÇINARI/
Lexo gjithashtu
