Trajneri i Skënderbeut, Andrea Agostinelli, ka zbarkuar prej disa ditësh në Shqipëri. Ai ka vëzhguar terrenet në Korçë, ndërsa do të nisë sot përgatitjet me ekipin e tij për sezonin e ri futbollistik. Pasi bëri një gjysmë viti të shkëlqyer me të kuqtë, ku kishte shanset për t'u shpallur kampion, ai tashmë dëshiron që këtë qëllim ta përmbushë te korçarët.
[caption id="attachment_7395" align="alignleft" width="300"]
Ndeshja Skënderbeu - Partizani 0-1, kur Agostinelli drejtonte të kuqtë[/caption]
I mërzitur nga fakti që skuadra e tij u përjashtua për një vit, Agostinelli tregon se dëshiron që të bëjë një punë të madhe për të fituar titullin kampion në Korçë. Mes të tjerash tregon marrëdhëniet me trajnerin e Partizanit, të cilin në Itali e ka pasur mik të mirë.
"Do të qëndrojmë në Korçë për t'u përgatitur sa më mirë fizikisht dhe të jemi gati. Mendoj se klima do të jetë e përshtatshme për të zhvilluar seanca të qeta dhe për të marrë maksimumin prej tyre. Edhe tifozët i ka marrë malli për ekipin dhe kanë nevojë ta kenë pranë, ta ndiejnë atë", tha fillimisht tekniku italian duke treguar arsyet pse Skënderbeu do të zhvillojë përgatitjet në Korçë dhe jo në një vend tjetër jashtë Shqipërisë siç ka ndodhur më parë.
Sa i përket faktit të skualifkimit për një vit nga Champions League, Agostinelli tregon: "Fakti që nuk morën pjesë në Champions nuk ishte më e mira e mundshme për ne. Jam mërzitur disi, ashtu sikundër janë mërzitur të gjithë. Por, tani i kemi vënë detyrë vetes që këtë ta rifitojmë në të ardhmen".
Për Agostinellin fitimi i titullit kampion në sezonin e ri është një detyrë dhe nuk diskutohet. "Skënderbeu dhe titulli janë të lidhur ngushtë me njëri - tjetrin. Mua më pëlqen gjithnjë të fitoj dhe jam i uritur në këto momente për të marrë sa më tepër trofe".
I pyetur për Partizanin, tekniku i të kuqve shprehet se ka bërë punë të mirë atje. "Kam bërë një super-punë te Partizani, edhe për sa i përket mentalitetit që duhet të kishte kjo skuadër. Sigurisht, dua të tregoj se nuk kam qenë unë ai që u largua nga Partizani. Me Sormanin jemi miq të mirë, por ai nuk më ka telefonuar ende. Por, jam i bindur se ai do të bëjë mirë te Partizani".
Lexo gjithashtu
