Tirana do të presë nesër në 20:00 Crvena Zvezdën për raundin e dytë të Uefa Champions League. Bardheblutë e Emmanuel Egbo janë bërë lajm nga mediet serbe, teksa një ndër mediumet më të mëdha, Kurir është rikthyer në tetorin e 2014 kur mbi stadiumin e Beogradit u ngritën simbolet shqiptare.
Kurir shprehet se me Tiranën është Andi Lila, një ndër protagonistët e ndeshjes Serbi - Shqipëri 6 vite më parë. Kolegët serbë duhet të informohen më saktë, pasi kavajasi nuk është pjesë e listës prej 23 lojtarësh që Tirana ka dorëzuar në UEFA për këtë duel. Lila në versionin "huligan" dhe histroi me drone, këto janë çartjet e radhës në Serbi.
"Për fat të mirë bardhekuqtë do të luajnë me stadiumin bosh, por kjo nuk do të thotë që pritësit nuk do gjejnë ndonjë mënyrë për të provokuar futbollistët e kampionatit serb. Një shqiptar që sulmoi Mitrovic për zbritjen e dronit pret Yllin e Kuq. Ai luftoi në Beograd për të ashtuquajturin flamur i Shqipërisë së Madhe", shkruajnë serbët për Andi Lilën.
"Shqiptari asokohe u përlesh ashpër me Stefan Mitrovic, pasi futbollisti serb rrëmbeu flamurin e diskutueshëm.
Lila u përpoq ta pengonte Mitrovic të merrte flamurin, kështu që kishte kaos të përgjithshëm në fushë. Në atë rast, futbollisti i Tiranës u përplas edhe me tifozët, që nxituan në fushë për të marrë flamurin provokues. Shpresojmë të mos kemi skena të ngjashme të martën në Tiranë", vijojnë serbët.
