Eneo Bitri është në “radarin” e klubeve të huaja në këtë merkato vere. Qendërmbrojtësi i Partizanit ka bërë paraqitje pozitive me të kuqtë duke rënë në sy të të huajve. Burime të besueshme bëjnë me dije për Newsport.al që shtatlarti ka ngjallur interes në Izrael. Prej kohësh, Hapoel Tel Aviv ka ndjekur me vëmendje performancat e beratasit.
Tashmë, në këtë merkato vere në drejtim të tij ka ardhur ofertë zyrtare. Madje të njëjtat burime tregojnë se izraelitët janë gati të paguajnë një shifër modeste në klub për kartonin e futbollistit. 25-vjeçari shihet si lojtar kyç në repartin e difensivës dhe interesi është i madh për të mësuar nëse drejtuesit do të japin “OK”-në që të largohet në drejtim të Izraelit.
Eneo Bitri iu bashkua Partizanit në merkaton e dimrit. Me t’u rikthyer tek të kuqtë, shtatlarti fitoi vendin e titullarit dhe bashkë me Belicën, krijuan mbrojtjen e pathyeshme. Arma e fortë në ajër si dhe saktësia në vertikalizime, kanë rënë në sy të izraelitëve që janë gati ta rrëmbejnë në gjirin e tyre. Mirëpo problem është kontrata me Partizanin, e cila përfundon në fund të sezonit të ardhshëm.
Edhe pse drejtuesit e Hapoel Tel Aviv janë gati të paguajnë, tek të kuqtë vështirë ta lëshojnë beratasin pa një shumë të majme. Ai është pjesë e rëndësishme e projektit të Partizanit për Kupat e Europës si dhe për edicionin e ri futbollistik. Në sezonin që lamë pas, Bitri u aktivizua në 17 ndeshje, duke arritur të shënojë edhe 2 gola. /Retin TOKA/
Lexo gjithashtu
