Ditën e djeshme në “Elbasan Arena” është zhvillua dueli për kreun e Kategorisë së Dytë mes SF Elbasanit dhe Pogradecit. Ky takim ka përfunduar në barazim 1-1, duke bërë që skuadrat të ndajnë nga një pikë pas 90-minutave.
Pas dhunës në fushën e lojës, ku lojtarët, Hysenllari dhe Zefi sulmuan arbitrin, Oltijon Yzeiraj, pasi ky i fundit akordoi penallti për Elbasanin, dhunë do të kishte edhe në fund të sfidës.
Kësaj here është sulmuar autobusi i ekipit të Pogradecit kur ata po largoheshin nga Elbasani, teksa kanë goditur me sende të forta xhamin e autobusit.
Për këtë episode aspak të hijshëm për futbollin shqiptarë është vënë në pranga nga policia një 22-vjeçar, i cili është arrestuar.
“Goditi me send të fortë (shishe qelqi), xhamin e autobusit në të cilin udhëtonte ekipi i futbollit KF Pogradeci, vihet në pranga 22-vjeçari.
Specialistët për Hetimin e Krimeve të Komisariatit të Policisë Librazhd, menjëherë pas njoftimit të marrë se pas përfundimit të ndeshjes së futbollit të zhvilluar ditën e djeshme, në stadiumin Elbasan Arena, ndërmjet skuadrave KF Pogradeci dhe KF Elbasanit, në aksin rrugor “Elbasan-Librazhd”, në afërsi të Librazhdit, një shtetas kishte goditur me send të fortë (shishe qelqi), xhamin e autobusit në të cilin udhëtonte ekipi i futbollit KF Pogradeci, kanë organizuar punën me qëllim kapjen e tij.
Falë veprimeve të shpejta operacionale, u bë e mundur kapja dhe arrestimi i shtetasit Xh. Zh., 22 vjeç, banues në Elbasan, për veprën penale “Shkatërrimi i pronës” dhe “Goditja e sportistit, trajnerit, arbitrit, ndërmjetësit sportiv”.
22-vjeçari, teksa lëvizte me automjet, ka goditur me send të fortë (shishe qelqi), xhamin e autobusit në të cilin udhëtonte ekipi KF Pogradeci, pas zhvillimit të ndeshjes së futbollit, ditën e djeshme, në stadiumin Elbasan Arena.
Nga goditja, nuk është dëmtuar asnjë nga futbollistët që ndodheshin në autobus. Materialet procedurale i kaluan Prokurorisë pranë Gjykatës së Shkallës së parë Elbasan, për veprime të mëtejshme”, thuhet në njoftimin e policisë.
Lexo gjithashtu
