Partizani doli fituese në derbin mes Tiranës teksa mposhti bardheblutë me rezultatin e pastër 2-0 me golat e Christian Mba dhe Tedi Carës, nga një për çdo pjesë. Të kuqtë marrin kreun e renditjes por me pikë të barabarta me kampionët në fuqi. Një ndeshje që nuk prodhoi një lojë atraktive, kjo ndoshta edhe për faktin se u ndërpre disa herë për shumë minuta nga tifozëritë të cilët hidhnin mjete piroteknike në fushë.
Një derbi ka “luftë” në disa fronte, në fushë, në tribuna por edhe në pankina. Ajo e tribunave s’tradhëton ndonjëherë me dy tifozëritë që nuk rreshtin së kënduari për ekipin e tyre. Kjo në fushë u fitua qartësisht nga Partizani, kjo sepse trajneri Colella ia doli të mposhtë sërish kolegun e tij, Orges Shehin.
Të dy skuadrat e nisën me 3-5-2 por kjo skemë ishte një dështim total për bardheblutë që nuk dinin ku ishin në fushën e lojës. Tekniku italian i të kuqve, duke parë që sulmuesit e Tiranës, Patrick dhe Hasani ishin të vetëm në sulm, hoqi dorë nga mbrojtja me 3 duke kaluar me 4 ku Hadroj dhe Atanaskoski u kthyen në pozitat natyrale.
Këtu filloi edhe dominimi i Demave që fituan mesfushën dhe ofronin siguri në mbrojtje duke bërë që sulmi të ishte më i qetë në fazën ofensive. Një Partizani që në çd ofazë të lojës dukej i qartë, i pastër, lojtarët “lundronin” në fushë dhe grupi lëvizte si një trup i vetëm.
Lexo gjithashtu
