Kombëtarja shqiptare në volejboll për femra është mundur sot 3-2 nga Bjellorusia në ndeshjen e tretë të Grupit A, sfidë e vlefshme për eliminatoret e Ligës Europiane. Një ndeshje me dy pamje e kombëtares së trajnerit Altin Martiri, që pasi udhëhoqi takimin në dy setet e para nuk arriti dot të fitojë. Janë bjelloruset që luajnë më mirë në tri setet e tjera, përmbysin shifrat, duke fituar më pas tri sete radhazi dhe korrin suksesin e parë në grup. Shqipëria pati shansin të arrijë të paktën një fitore sot, por nuk arriti të konkretizojë punën e mirë, duke lëshuar terren pas avantazhit. Këto eliminatore të Grupit A u luajtën në Poloni, aty ku Shqipëria humbi 3-1 dy takimet e para ndaj kombëtares vendase dhe asaj sllovake.
Ndeshja nis mjaft mirë për vajzat kuqezi, që në setin e parë kanë epërsi absolute, duke u shkëputur 8-1 që në pikët e para. Bjelloruset luajnë me hope, për një moment ngushtojnë shifrat, por pa mundur të rivalizojnë. Shqipëria është gjithnjë përpara dhe fiton thellë 25-17 setin e parë. Më i bukur seti i dytë, me Bjellorusinë që ka komandën e lojës në pikët e para, por pa mundur të shkëputet. Në pikën e 12-të vajzat shqiptare barazojnë dhe deri në fund ka barazime të shpeshta dhe ekuilibër në parket. Por shpejtë kombëtarja kuqezi shkëputet dhe fiton 25-22 setin e dytë.
[caption id="attachment_717" align="alignright" width="500"]
Ekipi i Volejbollit gjatë një ndeshjeje[/caption]
Seti i tretë është i dobët për Shqipërinë, që është inekzistente në parket. Bjelloruset kanë epërsi gjatë gjithë kohës, shkëputen dhe fitojnë thellë 25-11, duke rihapur ndeshjen. Vajzat shqiptare përpiqen të rivalizojnë në setin e katërt, që është më i ekuilibruar, por pas pushimit të dytë teknik është Bjellorusia që ka komandën e lojës në dorë, shkëputet 20-16 dhe fiton 25-23 edhe pse në fund vajzat kuqezi barazojnë 23-23, por pa mundur t’i përmbysin shifrat. Barazim 2-2 dhe fituesi vendoset në setin final.
Seti final nis me ekuilibër nga të dyja ekipet, por shpejt bjelloruset marrin komandën, të karikuara edhe nga përmbysja që i bënë rezultatit pas disavantazhit 0-2 me sete. Në shifrat 8-4 ndërrohen fushat, por janë sërish rivalët kuqezi që kanë komandën dhe fitojnë 15-10 setin final dhe krejt takimin 3-2. Kështu, Shqipëria e mbyll në vendin e fundit fazën e parë në Grupin A me vetëm një pikë, ndërkohë që pas dy javësh, në Durrës, do të luhen ndeshjet e dyta në grupe. Kombëtarja mbërrin nesër në Tiranë, ku do të rinisë përgatitjet.
Shqipëri – Bjellorusi, 2-3 (25-17, 25-22, 11-25, 23-25, 10-15)
SHQIPËRIA: Bici, Thaka, Tuci, Marina, Xheka, Fagu (L), Matoshi, Agaj, Nezaj, Ar.Prenga, Sejfullai (L), Blloku, Am.Prenga, Meçorrapaj. Trajner: Altin Martiri
BJELLORUSIA: Malasai, Klimovich, Harelik, Fedarynchyk (L), Silantsyeva, Kuchko, Pauliukouskaya (L), Seryk, Kapko, Ionava, Hryshkevich, Barysevich. Trajner: Aliaksandr Klimovich Gjyqtarë: Gianni Bartolini (Itali), Thien Khuc (Austri)
Lexo gjithashtu
