Derbi është epiqendra e futbollit shqiptar këtë javë me Partizanin e Tiranën që do të përplasen të hënën në orën 19:00 në “Air Albania”. Nevil Dede, në një intervistë ekskluzive për Newsport.al, tregon nga pikëpamja e tij situatën e dy ekipeve para ndeshjes por pa harruar edhe çështjen “Dinamo”.
Në krye të “nëndetëses” që prej fillimit të sezonit, Nevil Dede mori përsipër detyrën për të ndërtuar një ekip të denjë për t’u rikthyer në elitën e futbollit shqiptar. Pothuajse gjatë gjithë kohës në krye të renditjes por disa rezultate negative së fundmi bënë që “Blutë” të humbasin vendin e parë dhe kjo bëri që drejtuesit të ndanin rrugën me teknikun 48-vjeçar.
Cili fiton derbin, kush veproi më mirë në merkato, marrëdhënia me Dinamon, e ardhmja e tij dhe refuzimi për të shkuar në stadium të hënën, Nevil Dede i thotë të gjitha më poshtë.
- Jemi prag derbi, si i shihni të dyja skuadrat para sfidës?
Ngjarja më e bukur e vitit në futboll pas ekipit kombëtar. Tirana besoj është pak më e qetë sepse vjen me 3 pikë diferencë. Partizoni luan për ta fituar dhe të hap kampionatin pra të filloj luftën edhe njëherë për titull, plus me një fitore ekipi dhe lojtarëve t’i kthehet besimi se vërtetë mund të luftojmë për titull.
- -Tirana ka qetësi psikologjike.
- -Tirana ka qetësi në portë në ndryshim me Partizanin që kanë lëvizur me portierët shumë.
- -Tirana ka numrat golave të shënuar dhe pësuar më mirë.
- -Janë të barabarta në mesfushë
- - Partizani ka motivim më të madh, për të rihapur kampionatin.
- -Partizani ka avantazh elementin surprizë sepse mund të ndryshojë emrat dhe vendosjen.
- Si Tirana, edhe Partizani kanë shitur kapitenët dhe dy golashënuesit në janar, a ishte ky rrezik i marrë nga drejtuesit për ecurinë e kampionatit?
Është e vërtetë që të dyja kanë transferuar edhe të njëjtët pozicione. Në pamje të parë janë të barabartë në cilësi dhe rëndësinë e lojtarëve. A ka rrezik? Kjo vlen për t’u parë në fund të sezonit. A mund të duronin? Nuk mund ta thuash as këtë… Klubet tona nuk mund të bëjnë sakrifica të mëdha financiare sepse i kemi të brishta për arsye se kanë pak burime fitimë për të shëndoshur arkën e klubit.
- Te Tirana, Haxhiu dhe Lushkja janë kthyer në titullar absolut ndërkohë pritet edhe kthimi i Abazajt ndërsa te Partizani ende s’kemi parë shkëndija nga të rinjtë, gabuan të kuqtë?
Pyetje e gjetur por unë mendoj se të dyja klubet kanë marrë lojtarë shumë të mirë. Tirana ka marrë lojtarë të kampionatit shqiptar, me pasaporte shqiptare, dhe kjo do të thotë se ata përshtaten shumë më shpejt.
Partizani ka marrë lojtarë nga kampionati kosovar dhe maqedonas dhe duan më shumë kohë përshtatje. Por nuk jam dakord në asnjë mënyrë që ka bërë mirë një klub dhe ka gabuar klubi tjetër.
- Sezon me oshilacione edhe te Dinamo, çfarë mendon se nuk shkoi me “Blutë”?
Dinamo me oshilacione? Nuk jam dakord sepse kemi qenë gjithë kohën në vend të parë dhe fjala oshilacione nuk shkon. Për mua ishte histori suksesi por…. Durimi dhe Koha janë dy gjëra që nuk shkojnë në logjiken e futbollit shqiptar. Dhe unë di të them se koha do tregojë.
- A ndikoi pauza e gjatë e Botërorit në rezultatet e Dinamos?
Jo nuk është justifikim ky. Ekipi që kam ndërtuar është i plotë me eksperiencë dhe të rinj shume të talentuar. Kompozim perfekt dhe e ardhme e sigurtë. Koha është përcaktuesi më i mirë i vlerësimit të punës së një trajneri por ky koncept nuk shkon në realitetin tonë.
- Sezonin e mbyllni pushim apo jeni në pritje të një tjetër detyre?
Nuk jam dakord me parimin të gjej punë sezonale me çdo kusht sepse janë dy gjëra që më vijnë direkt në mend: Do i marr suksesin parardhësit, atij që ka ndërtuar ekipin dhe do i faturoj dështimin po atij që ka ndërtuar ekipin.
- Dy arsye pse fiton Tirana dhe dy arsye pse fiton Partizani?
Siç e thashë edhe më lart po i bie shkurt: Tirana ka qetësi psikologjike dhe ka ditur të vuajë më shumë ndërsa Partizani ka elementin surprizë dhe një motivim të madh. Them për Partizanin këto të dyja sepse nuk po ndjehet fare mediatikisht.
- Një parashikim për derbin?
Mund të them edhe fjalë apo fjali që përdoren rëndom nëpër intervista si për shembull “do vendosin gabimet” ose “do vendosin episodet” por jam i bindur që të dyja ekipet si Tirana ashtu edhe Partizani kanë repartin e mesfushës më të mirë të sezonit. Pra parashikimi im eshte ky: Do fitojë mesfusha.
- Do të jesh në Air Albania?
Jo nuk do shkoj sepse do lodhem duke takuar dhe njëkohësisht edhe duke u shpjeguar miqve apo edhe tifozëve “Pse u prish marrëdhenia me Dinamon? Pse Dinamo ndërpreu marrëdhënien me Nevil Deden?”
- Mesazhi për tifozëritë?
Shijoje miku im ndeshjen! Duhet të mendojmë "oh sa mirë më në fund derbi Tirana-Partizani", kulmi apo maja futbollit shqiptar./Glejdi FEJZA/
Lexo gjithashtu
