3 sezone, 12 gola të shënuar dhe emocione të papërshkrueshme me fanelën e kuqe. Jashtë fushe ishte gjeneral, brenda saj "ushtari" i përbetuar i çdo skuadre në Shqipëri. Bruno Telushi, mesfushori vlonjat rikthehet të flasë para derbit Tirana - Partizani. Ai e di mirë vlerën e kësaj ndeshje dhe një intervistë speciale për newsport.al rrëfen emocionet, përjetimet si dhe ndalet te sfida e së premtes mbrëma në "Air Albania Stadium".
Karriera e tij në Azerbajxhan po shkon mirë, ndërsa thekson se dëshiron vetëm progres nga këmbët e tij. 29-vjeçari analizon shkurtimisht Superioren, duke mos harruar as Kukësin e Skënder Gegës me të cilin nisi këtë sezon futbollistik.
Derbi pa Guerrilsat? Sigurisht që dhe për këtë ka një përgjigje nga vlonjati i Neftçi Baku.
- Bruno si po shkon aventura juaj në Azerbajxhan?
Aventura ime në Azerbajxhan po shkon mjaft mirë. Jam shumë i lumtur dhe shpresoj të vazhdoj në këtë rrugë, pse jo duke njohur gjithmonë progres.
- Situata e vështirë në gjithë botën, si ka ndikuar pandemia në ekipin tuaj?
Po, është e vërtetë. Është një situatë shumë e keqe në gjithë botën. Askush s'e priste një gjë të tillë. Në ekip çdo gjë është OK. Nuk ka raste për t'u bërë problem sepse ne jemi shumë të kujdesshëm dhe rregullat janë shumë strikte.
- Pas largimit tuaj nga Shqipëria, e keni ndjekur Superligën?
Të them të drejtën ndjek vetëm ndeshjet e rëndësishme të Superligës. Por, këto përmbledhjet i shoh të gjitha, së bashku me moviolën në panelet sportive.
- Kukësi me të cilin nisët sezonin, dalëngadalë po njeh progres. Edhe pse Skënder Gega larg për shkak të Coronavirusit, nënkampionët po bëjnë mirë...
Kukësi ka nisur të tregojë veten dhe më bëhet qejfi që po ngrihet dhe po arrin të fitojë. Nuk e filloi mirë kampionatin dhe kjo gjë s'i ka hije Kukësit pasi luan çdo vit për titull kampion. Pavarësisht se tani është në moment të vështirë pasi po stërvitet dhe pa trajnerin e tyre. Kjo s'është e lehtë. Por, jam i bindur që edhe në këtë situatë, Gega është ai që i jep leksionet e veta ekipit kuksian.
- Edhe Partizani, një skuadër për të cilën keni dhënë gjithçka po befason me lojërat e tij. Të premten Partizani luan kundër Tiranës, një ndeshje që e keni përjetuar dhe shijuar. Si e parashikon këtë sfidë?
Normalisht Partizani ka shumë lojtarë që dolën kampionë dhe kjo s'është për t'u çuditur. Tani kanë katër futbollistë të rinj që po luajnë mirë dhe po tregojnë egon e tyre për formacionin. Po bëjnë një kampionat të mirë. Ndeshja me Tiranën është derbi dhe derbit dihen. S'do të thotë forma aktuale e asnjërës prej skuadrave. Në atë sfidë duhet të japësh maksimumin dhe ta shijosh në maksimum.
- Në ekipin e kuq keni lënë miq si Bitri, Idrizaj apo edhe të tjerë. A e keni ruajtur mardhëniet me njëri-tjetrin?
Këtë ndeshje nuk dua ta parashikoj fare sepse dihet që unë dua të fitojë Partizani. Te Partizani kam shumë miq, jo vetëm Bitrin dhe Idrizajn. Kam edhe shumë shokë të tjerë si Belicën, Albanin, Malën të gjithë ata që kanë qenë pjesë e ekipit që ne dolëm kampionë atë vit, unë i kam miq shumë të mirë.
- Çfarë kujtimesh keni nga derbi? Keni edhe qenë dëshmitar i një derbi përmes të cilit fituat titullin, por një vit më vonë u mposhtët me rezultatin e thellë 5-1...
Nga një ndeshje derbi kam shumë kujtime të bukura, si ajo që fituam titullin kampion. Ka qenë emocion i madh, pasi siguruam matematikisht titullin. Por, kam edhe kujtime të hidhura siç është ndeshja 5-1, sfidë e vështirë për t'u harruar.
- Kush beson se do ta vendosë atë sfidë?
Kam shumë dëshirë që për herë të parë në derbi të shënojë Bitri dhe t'ia japë ai fitoren ekipit.
- Në një lidhje të ngushtë me Guerrilsat, sa do t'i mungojnë ata asaj supersfide?
Normalisht kjo dihet. Unë kam një lidhje të ngushtë me ta. Janë tifozë fantastikë, janë tifozët më të mirë në Shqipëri, Guerrilsat dhe normalisht do t'i mungojnë shumë Partizanit në një ndeshje derbi. Ata gjithmonë japin maksimumin e tyre dhe janë vërtetë lojtari i 12-të. /Retin TOKA/
Lexo gjithashtu
