Korabi është një nga ekipet që e nisi sezonin si një nga pretendentet kryesor për tu ngjitur në Superiore. Por performancat e ekipit dibran deri më tani nuk kanë aq të kënaqshme, madje janë larg kreut të renditjes. Skuadra e Korabit renditet në vendin e gjashtë në tabelën e klasifikimit me 23 pikë të grumbulluara pas 16 ndeshjes.
Pavarësisht formës jo perfekte të ekipit, porta e Korabit mbrohet nga një prej “gardianëve” më në formë, jo vetëm në Kategorinë e Parë, por edhe në Superiore. Portieri i Korabit, Avernold Qyrani është një nga pikat kyçe të këtij ekipi. Diçka të tillë e “thonë” vetë statistikat që Qyrani ka në këtë sezon futbollistik.
Në 15 sfida të luajtura, Qyrani ka pësuar vetëm 8 gola në 7 prej këtyre sfidave, ndërsa 8 ndeshje të tjera i ka përfunduar me portë të paprekur. Teksa është vetë portieri 25-vjeçar që një intervistë eksklzuive për “Newsport.al”, flet për formën e Korabit dhe objektivat e ekipit. Por nuk ka si anashkalon formën e tij fantastike, duke treguar arsyen e motivimit, idhullin dhe ëndrrën e tij më të madhe.
- Sa zhgënjyese është për ju që ekipi e mbylli gjysmën e parë të sezonit në vendin e gjashtë?
“Si fillim dua t’ju falenderoj për vlerësimin që më keni bërë. Jeni një nga mediat më të mëdha sportive dhe është kënaqësi të intervistohem nga ju. Përsa i përket renditjes nuk mund ta quaj zhgënjyese pasi është një kampionat shumë i fortë. Ekipet janë me traditë dhe me emër, jo vetëm në Kategorinë e Parë, por edhe në Superiore. Por mund të them që ndjej keqardhje për disa pikë që kemi lënë rrugës.”
- Si mendoni të bëni kthesën pas rikthimit në janar?
“Duhet të vazhdojmë të stërvitemi sa më fort dhe me seriozitet siç kemi qenë. Duhet të japim maksimumin që mos të na ngelet asgjë pishman. Duhet t’i marrim ndeshje një e nga një dhe besoj po vazhduam me këtë motivim, çdo gjë do të shkojë mirë.”
- Jeni portieri që keni pësuar më pak në Kategorinë e Parë, vetëm 8 gola në 15 ndeshje, ndërsa 8 herë e keni mbajtur portën e paprekur. Çfarë ju motivon dhe cili është çelësi i suksesit?
“Deri tani me statistikat që kemi, jemi mbrojtja që kemi pësuar më pak dhe për këtë gjë dua të falenderoj të gjithë ekipin. I falenderoj të gjithë sepse sot në futboll, mbrojtja fillon nga sulmi dhe sulmi fillon nga porta. Ndaj dua të jem mirënjohës për të gjithë. Përsa i përket motivimit të them të drejtën duke parë që nga ndeshja në ndeshje po pësojmë më pak. Kjo më bën më të fortë për të dhënë maksimumin, që të nesërmen në stërvitje dhe për të mbajtur portën përsëri të paprekur ditën e ndeshjes.
- Ju nuk pësoni, por faza ofensive nuk shënon. Çfarë nuk shkon?
“Kemi patur probleme për të shënuar në fillim të sezonit. Kjo ndodhi për shkak se ndërtuam një ekip pothuajse nga e para, ku patëm shumë largime dhe po ashtu afrime të reja. Por mendoj se tani jemi në rrugën e duur psai jemi përshtatur më së miri me njër-tjetrin dhe veç golave kanë ardhur dhe rezultatet.”
- Objektivat që Qyrani ka?
“Të them të drejtën objektivi im për momentin është të vazhdoj dhe të jap maksimumin tim këtu tek Korabi, pasi është ditur se është një ambient që e dashurojnë sportin. Si stafi, lojtarët, po ashtu edhe tifozët e mrekullueshëm janë të dashuruar pas futbollit dhe nuk dua t’i zhgënjej. Dua t’iu jap atë kënaqësi që edhe ata më dhurojnë mua.”
- Objektivat e Korabit?
“Përsa i përket objektivave të ekipit na kërkohet që t’i marrim ndeshjet një e nga një. Të japim maksimumin dhe të presim se si do të renditemi kur të mbarojë kampionati, pasi nuk duhet nënvlerësuar asnjë kundërshtar nga i pari e deri tek i fundit në tabelën e renditjes.”
- A i trembeni konkurrencës pasi “lufta” për ngjitjen në Superiore është e fortë?
“Për momentin nuk jemi dhe aq komod në tabelën e renditjes. Por kjo nuk tregon se ne duhet të trembemi pasi kemi fituar me kundërshtarë si Elbasani dhe Bylis që po udhëheqin renditjen, e shumë ekipe të tjera prandaj asgjë nuk është e paarritshme nëqoftëse nuk dorëzohesh. Si në dy sezonet e fundit që shkuam deri në fazën play-off ndaj Erzenit dhe Egnatias.”
- Qyrani dhe merkato e janarit?
“Jam në kontratë me ekipin e Korabit. Dua ta respektoj kontratën deri në fundin e saj.”
- Idhulli juaj?
“Kur kam filluar të ndjek futbollin, unë kam qenë tifoz i Barcelonës. Të them të drejtën idhulli im i parë ka qenë Victor Valdes. Por tashmë ai nuk luan më dhe portieri që më pëlqen më shumë momentalisht është Marc Andre Ter-Stegen.”
- Ëndrra më e madhe e juaja përsa i përket karrierës?
“Ëndrra më e madhe e çdo futbollisti shqiptar besoj se është kombëtarja. Pasi duke parë se në çfarë nivelesh kemi arritur, ajo është me të vërtetë ëndërr për mua.
Në mbyllje të intervistës, Qyrani nuk nuk harron t’i dërgojë një mesazh shefit të Korabit, Fehmi Mziut që ndodhet pas hekurave.
“Dua t’i them shefit tonë Fehmi Mziu që të presim sa më shpejt dhe qëndro i fortë ashtu siç ne na ke mësuar.”
/Nikoll Andrea Rajta/
Lexo gjithashtu
