14 tetor 2014, në Beograd ngrihet flamuri i Shqipërisë së Madhe! Pikërisht dy vite më parë, në "Partizan Stadium" ndodhi një nga ngjarjet që do të kujtohet gjatë në botën e futbollit, por mbi të gjitha në radhët e shqiptarëve dhe serbëve.
[caption id="attachment_44989" align="alignleft" width="300"]
Tifozët serbë shqyejnë hekurat rrethues të stadiumit dhe disa prej tyre hyjnë në fushë[/caption]
Nën sytë plot urrejtje dhe sulmet verbale "vritni shqiptarët" nga 30 mijë tifozë serbë prezentë në stadium, Kombëtarja kuqezi del në fushën e impiantit sportiv të Partizanit të Beogradit për të luajtur ndeshjen e radhës së Eliminatoreve të "Euro 2016", pikërisht ndaj Serbisë më 14 tetor 2014.
Sfida është interesante në fushë, por jo aq në tribuna, ku ndodhen vetëm tifozë serbë dhe asnjë shqiptar, madje, edhe delegacioni që shoqëronte ekipin shqiptar u detyrua të "griste" çdo simbol kombëtar të Shqipërisë nga veshjet e tyre. Diskriminim!
Shenja kuqezi shiheshin vetëm në fushë te lojtarët, aty ku Mavraj dhe Cana godasin dy herë me kokë brenda 5 minutave, ngjitur me shtyllat e portës serbe, por pa fat, pasi topi nuk shkon në atë të bekuar rrjetë për shqiptarët.
Ndërkohë që Shqipëria fliste me gjuhën e futbollit dhe regjistroi dy raste për gol, serbët nisin të përdorin gjuhën e dhunës, ndonëse shkak sipas tyre, u bë droni që u ngrit mbi qiellin e stadiumit të Beogradit. Një mjet fluturues që valëviti mbi kokat e serbëve, flamurin e Shqipërisë së Madhe, ndërsa mbi të skaliteshin figurat e Ismail Qemalit dhe Isa Boletinit.
Serbëve nuk iu besohet! Çfarë ndodh pikërisht në kultin e tyre të sportit dhe pikërisht në kulmin e tyre të ofendimeve raciste "vritni shqiptarët"? Ngrihet droni që iu verbon sytë dhe iu humbet logjikën.
[caption id="attachment_44983" align="alignleft" width="300"]
Mbrojtësi i Serbisë, Mitroviç duke shkulur nga droni flamurin e Shqipërisë së Madhe[/caption]
Mbrojtësi i kombëtares serb, Mitroviç është i pari nga lojtarët vendas që prek dhe mundohet, ndonëse pa sukses, të shqyejë flamurin kuqezi, tashmë të zbritur në fushë: "pa dashje, nuk doja që flamuri të binte në tapetin e gjelbër", do të deklaronte Ballist Morina, njeriu që mori përsipër këtë akt në mes të Beogradit.
Por, droni humbi kontrollin dhe flamuri i Shqipërisë së Madhe ra në fushë, duke u vendosur në duart e lojtarëve serbë, ndonëse jo për shumë sekonda, pasi në moment mblidhen lojtarët kuqezi dhe ua shkëpusin nga duart simbolin e atdheut të tyre.
[caption id="attachment_44982" align="alignleft" width="300"]
Tifozi serb godet me karrige në kokë, Bekim Balajn[/caption]
Sherr masiv në fushë, tifozë serbë që godasin lojtarët kuqezi, madje sulmuesi Bekim Balaj merr një goditje me karrige në kokë, ndërsa Canës nuk i mbajnë më nervat dhe nis të grushtojë në fushë, tifozin serb. Një hit më vete!
Kaos! Zhurmë! Tmerr! Në fakt, vetëm ata që kanë qenë atë ditë në fushë dhe në tribunë mund ta shpjegojnë çfarë kanë ndjerë, ose ndoshta jo! Mbase!
E çuditshme, por edhe në momentin që lojtarët kuqezi hyjnë në fushë, forcat e sigurisë së stadiumit, ashtu si në rastin kur njëri nga stjuartët godet Canën, edhe në këtë çast, ata që duhet të kujdesen për sigurinë fizike të lojtarëve nisin të nxitin turmën e revoltuar që të zbresin në fushë. E pafalshme!
[caption id="attachment_44986" align="alignleft" width="300"]
Taulant Xhaka me grushtin e ngritur lart para lojtarëve serbë[/caption]
Gjithsesi, flamuri u mor në dorëzim nga mjeku i skuadrës sonë Kombëtare, ndërsa fotoja e Taulant Xhakës me grushtin e ngritur lart para 10 apo më shumë lojtarëve serbë bëhet hit dhe bën xhiron e botës.
Gjithçka merr fund dhe gjyqtari sigurisht që fut lojtarët në dhomat e zhveshjes. Fusha e stadiumit "Partizani Stadium" në Beograd grumbullon vetëm huliganë me rripa nëpër duar dhe të "etur" për dhunë, mes tyre dhe Ivan Bogdanov, personazhi që në Xhenova vetëm pak muaj më parë kishte djegur një flamur shqiptar para takimit Itali-Serbi. Të gjithë ndoshta kanë pyetur: Si është ndjerë që simbolin kuqezi që e dogji në Xhenova duke e nxjerrë nga xhepi, ia ngritën mbi kokë në mes të Beogradit?
Gjithsesi, kjo nuk kishte shumë rëndësi para faktit se të gjithë tashmë ishin në akth për kthimin e skuadrës kuqezi dhe delegacionit që shoqëronte Kombëtaren në Serbi, përfshi edhe gazetarë.
Gjithçka merr fund! Kombëtarja merr sinjal se ndeshja nuk zhvillohet dhe niset me çarter për në atdhe, ndonëse, paranoja serbe vijoi edhe në dhomat e zhveshjes, kur policia vendase kontrolloi çantat e lojtarëve, me shpresën se mund të gjenin telekomandën që uli dronin me flamurin e Shqipërisë së Madhe në "Partizani Stadium".
Mbërritja e avionit që transportoi kuqezinjtë në aeroportin "Nënë Tereza" ishte një tjetër moment emocionues.
Mijëra tifozë ndezin aeroportin, ndërsa prezentë për të pritur ata që u quajtën "heronjtë e Beogradit" ishin edhe personalitet më të larta të politikës, zv.kryeministri Niko Peleshi dhe ministrja e Arsimit dhe Sportit , Lindita Nikolla.
Fjalimet e presidentit të FSHF-së, Armand Duka, trajnerit De Biazit dhe kapitenit Cana hodhën edhe më shumë dritë rreth ngjarjeve, ndërsa të gjithë e cilësuan si një "ferr" atë ngjarje të Beogradit, ndodhur pikërisht dy vjet më parë.
Ngjarje që pasuan një kalvar të gjatë gjyqesh, për fitoren që fillimisht e mori Serbia në tavolinë nga UEFA, ndërsa Shqipëria e gëzoi 7 muaj më pas si trepikësh pas gjyqit në KAS, gjykata më e lartë sportive që i dha të drejtën kuqezinjve të merrnin fitoren në tavolinë.
Një trepikësh që sigurisht ndikoi edhe në kualifikimin e Shqipërisë për në "Euro 2016", për herë të parë në historinë e Kombëtares sonë të futbollit.
Lexo gjithashtu
