Nis të luhet një javë parë dhe përfundon gjithmonë një javë pas. Derbi i kryeqytetit, sfida që kalon çdo lloj limiti, përballja që emocionon të madh e të vogël. I tillë ishte edhe ajo mbrëmje të vitit 2003. Shënonte data 3 maj dhe në "Qemal Stafa", Partizani i Neptun Bajkos priste Tiranën e Sul Memës që ishte vetëm disa javë larg titullit. Si në çdo përballje tjetër, edhe ajo natë është ngulitur thellë në memorien e tifozëve. Topi mes lojtarëve dukej si një "mollë sherri", të cilët luftonin për të çuar peshë të gjithë ata mbështetës që kishin zbarkuar për të ndjekur skuadrat e tyre të zemrës. Të kuqtë kishin një formacion kryesisht me futbollistë brazilianë. Kurrësesi asnjë tifoz i Partizanit nuk mund të harrojë Marcelo Brachinin, qendërmbrojtësin potent që në çdo dyluftim do të ishte fitimtar. Qoftë me faull apo pa faull, për kundërshtarin ishte gjithmonë një mur i pakalueshëm.
Nga ana tjetër, Tirana e Memës kishte lojtarë brilantë ku spikaste mesfushori Devi Muka. Vallëzonte me topin, driblonte këdo që i dilte përpara. Ishte ylli i ekipit. Pasi u dëgjua fërshëllima e startit të sfidës, të kuqtë u vunë menjëherë në zotërim të topit. Fillimisht u duk se ai derbi do të fliste në favor të tyre. Igli Allmuça, ishte protagonist për skuadrën e trajnerit Bajko teksa në minutën e 14-të të takimit arrin të zhbllokojë rezultatin duke mposhtur portierin Egbo. Atmosfera ishte e gjitha për të kuqtë. Skuadra e Bajkos u motivua dhe nisi të sulmonte për të gjetur golin e dytë. Mirëpo në mesin e fushës, Devi Muka mori në dorë frenat e lojës. Ylli i bardhebluve u shndërrua në ankth për lojtarët dhe tifozët e Partizanit. Në minutën e 45-të, Mahir Halili çon peshë tifozërinë bardheblu duke arritur të barazojë shifrat në 1-1. Pjesa e parë ndahet në paqe sa i përket rezultatit, sepse në fushë kishin nisur shkëndijat mes futbollistëve.
E dyta nis vrullshëm për bardheblutë që hidhen menjëherë në sulm për të shënuar golin e dytë. Në mesin e 45 minutave të dyta, Devi Muka lëviz bukur në hyrje të zonës së Partizanit duke shmangur Brachinin. Mesfushori çon në ekstazë tifozërinë bardheblu, të cilët e shoqëruan me ovacione lëvizjen e lojtarit kryeqytetas. Kaq mjaftoi dhe "Tata" i Partizanit me Beharin nisën të nxisnin brazilianin: "Braçe, si të iku ashtu?". Në një tjetër dyluftim mes tij dhe Mukës, braziliani ndërhyri ashpër dhe loja u ndal nga arbitri. Kaq mjaftoi dhe pjesa tjetër ishte lojë nervash.
Duhej të vinte minuta e 80-të dhe në fushë të bëhej një lëmsh i vërtetë. "Tata" ndërhyn keq ndaj Mahir Halilit dhe gjyqtari akordon 11-metërsh. Portieri i Partizanit lë skuadrën me 10 vetë, ndërsa në fushë fillojnë shkelmat dhe grushtet. Në atë moment, Brachini përfiton nga mosvëmendja e gjyqtarit dhe i vë këmbën mbi gjoks Devi Mukës. Brohoritjet e tifozëve të Partizanit i dhanë më shumë zemër brazilianit që ishte gati të niste një ndeshje boksi në fushë. Megjithatë gjithçka u shua dhe sfida vijoi të luhet. Penalltia shndërrohet në gol nga Halili dhe dy minuta më pas, akordohet sërish një 11-metërsh tjetër. Takimi mbyllet me shifrat 1-3 në favor të Tiranës. Por asgjë nuk kishte përfunduar në fushë.
Devi Muka s'mund ta harronte kurrësesi shkelmin e Brachinit mbi gjoksin e tij në mesin e fushës. Mesfushori bardheblu rastisi përballë brazilianit disa ditë më pas në një nga lagjet e kryeqytetit, konkretisht "Selvia". Inati nga ngjarja e ndodhur në "Qemal Stafa" tradhëtoi nervat e yllit bardheblu, duke e goditur me grushte futbollistin e Partizanit. Pas ndërhyrjes së kalimtarëve të rastit, gjithçka mori fund aty. Tirana fitoi në fushën e Qemal Stafës, ndërsa Devi Muka "triumfoi" disa ditë më vonë në rrugicat e kryeqytetit. /Retin TOKA/
Lexo gjithashtu
