Shqipëria do të luajë përballë Çekisë të enjten e 12 tetorit në orën 20:45 në stadiumin “Air Albania”. Një ndeshje mjaft e rëndësishme për të dyja Kombëtaren në kuadër të kualifikuesve të europianit të Gjermanisë që do të zhvillohet verën e ardhshme.
Në prag të kësaj sfide, ka folur në konferencë për shtyp trajneri i Kombëtares sonë, Sylvinho.
-A i shikon lojtarët që kanë nevojë për motivim, apo fakti që jemi deri këtu është motivues?
“Ne kemi përpara 3 finale dhe nesër do të jetë e para. Nuk do të jetë aspak e lehtë por jemi gati për tu përballur. Nesër është ndeshje e vështirë, por jo ndeshja që vendos kualifikimin. Kemi shumë punë për të bërë dhe shumë djersë për të hedhur në fushë.”
-Sa ia keni dalë që të përqëndroni lojtarët në ndeshjen me Çekinë?
“Kjo është pjesa jonë, të takojmë lojtarët. Javët e fundit stafi teknik ka bërë disa vizita duke takuar Muçin në Varshavë, apo në Barcelonë dhe Londës. Shpirti i garës dhe zemra që lojtarët vendosin në fushë, por dhe tifozët. Jemi të ndërgjegjshëm se ka shumë atmosferë me tifozët. Por nuk kemi pasur shumë punë me lojtarët pasi janë të motivuar për një ndeshje të tillë.”
-Gjendja fizike e Armando Brojës?
“Sa i përket Brojës më duhet të jap një lajm të keq. Ka qenë me skuadrën vetëm 2 ditë. Pas konsultave me mjekët tanë dhe të Chelseat, ai nuk ia del dot nuk do të jetë i gatshëm për nesër. Kemi dhe lojtarë të tjerë për të vlerësuar. Gjasula është gati për të luajtur.”
-Ndeshja juaj më e rëndësishme si trajner? Si mposhten çekët?
“Është një ndeshje që unë e menaxhoi si gjithë ndeshjet e tjera, të gjitha janë të vështira. Nëse flasim për kohën e tashme, kjo është ndeshja ime më e rëndësishme por aspak vendimtare. Na duhen pikë dhe duhet të bëjmë maksimumin.”
-Cili do të jetë stili i lojës që ne do të bëjmë?
“Është shumë e rëndësishme që të tregojmë zemrën në fushë, sidomos për tifozët. Diçka e tillë nuk do ta mungojë sepse kjo është forca e këtij ekipi. Nëse flasim për stilin taktik do të jetë pak a shumë si në ndeshjen e parë. Çekia është një ekip shumë i fortë, mund të jenë të rrezikshëm në krosime dhe goditje standard.”
-Ndeshje e rëndësishme por jo vendimtare…Doni të largoni presionin nga skuadra?
“Vendimtare do të jetë nëntori pasi vendoset kualifikimi. Ekipi është i ndërgjegjshëm se ku ndodhemi. Llogaritë do t’i bëjmë në nëntor. Mendoj minutat e fundit në Pragë, mund ta fitonim ndeshjen në minutat e fundit. Ndeshja e nesërme mund t’i ketë të gjitha brenda, mund të ndodhë gjithçka.”
-Në cilën anë rëndon më shumë presioni?
“Nesër do të shohim një ndeshje shumë të bukur. Ajo çka ndryshon nga ndeshja e parë është se luajmë në shtëpi dhe kanë ngelur dy ndeshje pas Çekisë. Ne kemi lojtarë si Hysaj, Gjimshiti, Strakosha që janë mësuar të luajnë me një presion për të tilla ndeshje. Më vjen mirë që ka mbështetje për lojtarë si Muçi, Asani. Po ata kanë lojtarë cilësorë si Coufal, Soucek. Do të jetë një ndeshje shumë e fortë.”
-A do të stafi i Shqipërisë që të marrë lojtarë nga Kosova?
“Nëse flasim për lojtarët e fundit që kanë ardhur janë lojtarë shumë të mirë që kanë bërë shumë mirë. Për momentin fokusin e kemi tek Çekia. Nuk ka lojtarë vetëm nga Kosova, por edhe nga Maqedonia. Nuk më intereson nga është prejardhja e lojtarit, mjafton të ketë aftësi dhe dëshirë për të luajtur për Shqipërinë.”
-Nëse në fund të sfidës rezultati do të ishte barazim, do të ishte e kënaqshme për ju apo do të merrni përsipër dhe rrezikun për 3 pikët?
“Sigurisht që nëse nuk do të arrijmë të fitojmë nesër, do të isha i kënaqur dhe me barazim. Por ne luajmë për fitore.”
-Lojtari i Spartës së Pragës, Qazim Laçi do të jetë nesër në formacion?
“Ende nuk e kemi vendosur formacionin. Në kokën tonë kemi vendosur vetëm 80%. Por sigurisht që kemi ende për të parë dhe nesër gjendjen e lojtarëve. Nëse e shohim dhe Laçin në fushë, por nuk kemi vendosur ende asgjë.”
Lexo gjithashtu
