Altin Lala ka folur për eksodin kuqezi në kombëtaren Shqiptare. Ish-mesfushori i përfaqësueses Shqiptare ka folur për "Panorama Sport" me tone kritike kundrejt De Biazit, në lidhje me largimin e Rashicës drejt përfaqësueses së Kosovës. Sipas Lalës, De Biazi duhej ta kishte futur së paku në listë për europianin "Francë 2016", duke qenë se ai ka deklaruar që e kishte në plane për dhjetë vitet e ardhshme. Gjithashtu Lala që është edhe menaxheri i Rashicës ka thënë që nuk ka ndikuar as pozitivisht, as negativisht tek zgjedhja e mesfushorit kosovar.
" Mendoj se nëse Rashica do kish qenë në Europian do ta kish pasur shumë të vështirë të linte Shqipërinë. Por duhet të jemi realistë, nëse një lojtar i ri dhe me shumë talent nuk ka asnjë shans as në listën me 23 veta, atëherë mendon se e ka të pamundur të jetë pjesë serioze e një projekti për të ardhmen", ka deklaruar Lala.
Më pas Lalës i është kujtuar nga gazetari që De Biazi e kishte në planet e tij për dhjetë vitet e ardhshme, por ai ka replikuar duke thënë:
"Më falni, po çfarë ka ndryshuar te Rashica tani që ai ka qenë dy muaj pushim?! Nuk mendoj se është bërë as lojtar më i mirë dhe as më i keq... Nëse paska qenë kaq i rëndësishëm për të ardhmen, ndoshta duhet të kish pasur një shans në Europian. Ne nuk prodhojmë shumë talente të kalibrit të tij. Gjithsesi, kjo ishte zgjedhja e trajnerit De Biazi dhe nuk dua ta komentoj më gjatë. Aq më tepër nuk dua të zhbalancohem mbi Rashicën pasi është edhe një lojtar me të cilin bashkëpunoj".
I pyetur nëse Lala kishte ndikuar sadopak për të mos bërë atë zgjedhje, ai tha:
"Nuk i kam thënë asgjë. I thash zgjidh me zemër".
Lexo gjithashtu
