Xhevahir Sukaj, ish-sulmuesi i të kuqve, në një prononcim për newsport.al ka treguar si se qëndron e vërteta e tij me klubin e kuq, pas aludimeve të shumta. Vetë shkodrani ka sqaruar që në ndeshjen me Slovan Bratisllavën, nuk ishte i gatshëm për të luajtur pas një shqetësimi në kofshë.
- A mund të na sqaroni se si qëndron e vërteta me klubin e Partizanit?
Nuk ka çështje me të kuqtë. Kam qenë i grumbulluar me ekipin. Kisha një shqetësim në kofshë dhe trajneri e pa të arsyeshme që unë mos të jem pjesë e formacionit, duke qenë që s'kam qenë as në fazën përgatitore që zhvilluan në Itali. Prandaj ai vendosi që unë mos të isha i gatshëm.
- Flitet për një kalim tuajin te skuadra malajzeze e Perak, është e vërtetë dhe për sa kohë keni nënshkruar?
Po është e vërtetë që unë kam nënshkruar për klubin malajzez Perak Fa. Kam rënë dakord për një kontrate 18-mujore.
- Thuhet se do të merrni 500 mijë dollarë me skuadrën e re, na e konfirmoni?
Nuk flas për shifra. Nuk kam fol kurrë. Ata që flasin në emrin tim për shifra, nuk dinë asgjë. Mund të jenë më pak, por ndoshta edhe më shumë
- Si ndiheni me aventurën e re?
Të them të drejtën nuk mund të them se si ndihem sepse shumë pak i njoh. Ata më kanë kërkuar me ngulm dhe besoj që do të shkojë gjithçka mirë.
- Një ndarje e papritur me tifozët e kuq, ç'mund të na thoni?
Vërtetë tifozët nuk e kishin menduar largimin tim, sidomos pas lajmit që qarkulloi që unë kisha nënshkruar me Partizanin. Megjithatë unë e kam derën e hapur çdo herë nga ata pasi kam marrëdhënie të shkëlqyera.
- Ditën e djeshme u patë në tribunë duke ndjekur ish skuadrën tuaj, na përshkruani pak emocionet.
Po isha në tribunë. Sinqerisht doja të isha në fushë. Emocionet ishin të shumta kur shihja shokët duke luftuar për fanellën e kuqe.
- Keni diçka për t'i thënë tifozëve të kuq?
Tifozëve u them që do të vijë dita që do të rikthehem. Derbin e radhës do vij ta shoh mes Guerrilsave.
Lexo gjithashtu
