Vllaznia do të luajë nesër kundër Partizanit, ndeshje e vlefshme për çerekfinalen e Kupës së Shqipërisë. Kjo sfidë do të zhvillohet në orën 17:00 në stadiumin e të kuqve. Ekipi i drejtuar nga Mirel Josa ka udhëtuar sot drejt kryeqytetit.
Por, para grumbullimit në hotelin ku do të qëndrojnë, ka ndaluar për të takuar në spital Esat Malën që i është nënshtruar një ndërhyrje kirurgjikale për rikuperimin e klavikulës. Në postimin e bërë në kanalin zyrtar të klubit, shkodranët bënin me dije:
“Ekipi i Vllaznisë ka udhëtuar sot drejt kryeqytetit për ndeshjen e rradhës, por njëkohësisht ka shfrytëzuar edhe mundësinë për t'i bërë një vizitë futbollistit kuqeblu Esat Mala që siç është bërë e ditur, i është nënshtruar ditën e djeshme një ndërhyrje kirurgjikale. Lojtarët dhe pjestarët e stafit teknik i kanë shprehur atij mbështetjen në këtë moment të vështirë dhe njëkohësisht i kanë bërë të ditur se e presin shpejt në gjirin e tyre.
Ndërkohë KF Vllaznia me këtë rast, përpos mjekëve dhe personelit të spitalit ku është bërë ndërhyrja e Malës, dëshiron të falenderojë edhe Spitalin Rajonal Shkodër, me stafin e mrekullueshëm të doktorëve dhe infermierëve që u gjendën pranë në rastin e këtij lojtari, dhe po ashtu edhe përkushtimin e veçantë të drejtorit të spitalit, Dr.Senad Hallunit”.
Lexo gjithashtu
