Një skandal i vërtetë duket në horizont në Shkodër, me klubin e Vllaznisë që ka akuzuar klubin spanjoll të Deportivo Alaves se ka mashtruar në lidhje me trasnferimin e futbollistit Erald Çinari.
Klubi shkodran ka dalë me një deklaratë të gjatë për shtyp ku analizon me detaje hapat e ndërmarra gjatë muajve të fundit për kalimin e pretenduar të lojtarit në Spanjë, ku raportohet se më pas të jetë huazuar te skuadra e Istria-s në Kroaci. Në deklaratë thuhet se në negociatat mes dy klubeve Vllaznia ka kërkuar fillimisht kohë, ndërkohë që Deportivo Alaves me disa shkresa zyrtare në drejtim të shkodranëve e ka bërë transferimin në një farë mënyre "fakt të kryer" duke pretenduar pranimin e kushteve nga ana e Vllaznisë. Shkodranët deklarojnë prerazi se nuk ka asnjë marrëveshje me asnjë klub për transferimin e Erald Çinarit.
Akuza shkon deri aty sa Vllaznia deklaron se klubi spanjoll pretendon se ka kryer pagesën për blerjen e lojtarit në një llogari që supozohet se është dhënë nga vetë shkodranët, por nga verifikimet e mëvonshme rezulton se kjo llogari ndodhet në Itali e nuk ka asnjë lidhje me klubin e Vllaznisë, duke aluduar për mashtrim.
Në thelb Vllaznia pretendon se klubi spanjoll dhe lojtari kanë vepruar prapa krahëve të klubit shkodran dhe pa dijeninë e këtij të fundit, duke u munduar të kompletojnë një transferim të lojtarit në kundërshtim me rregullat e FIFA-s. Për këtë ata kanë vënë në dijeni edhe klubin kroat pasi ky i fundit ka kërkuar ndërhyrjen në sistemin e FIFA-s për konfirmimin e transferimit. Në fund klubi i Vllaznisë bën të ditur se e ka çuar këtë çështje në FIFA për ta zgjidhur në mënyrë ligjore.
Presim tashmë zhvillimet në vijim, me reagimet që pritet të jenë të shumta duke parë akuzën e rëndë që është bërë madje në drejtim të një klubi të një prej kampionateve më të forta në botë.
[gallery columns="1" size="full" ids="268054,268055"]
Lexo gjithashtu
