Alban Xhaferi ka reaguar në lidhje me lajmet që qarkullojnë teksa bëhej e ditur se Vllaznia kishte disa gjyqe të hapura në FIFA. Kreu i klubit shkodran ka mohuar kategorikisht duke treguar se kuqeblutë kanë shlyer çdo detyrim ndaj çdo ish lojtari që ka qenë pjesë e kuqebluve.
Në një prononcim të shkurtër për ShkodraSport, Xhaferi zbulon se ka pasur disa probleme me Ante Aralicën, por gjithçka është zgjidhur me konsensus.
“Në lidhje me këtë lajm dua të konfirmoj për ju dhe përmes jush, për të sqaruar gjithë opinionin sportiv shkodran se nuk ka asgjë të vërtetë në këtë mes. Vllaznia nuk ka asnjë gjyq të hapur në FIFA për asnjë nga lojtarët për të cilët bëhet fjalë apo dhe ndonjë tjetër.
Marrëveshjet që kemi pasur me ta janë zbatuar dhe e vetmja çështje nëse mund të quhet e tillë ka qenë ajo e ish sulmuesit Ante Aralica që kishte disa pretendime. Por, edhe ajo është zgjidhur dhe si rrjedhojë, konfirmoj faktin që Vllaznia nuk ka asnjë gjyq të hapur në FIFA.
Çdo gjë është ashtu siç duhet jetë dhe ne jemi të fokusuar vetëm tek ndeshja e radhës me Partizanin”, ka thënë ai.
Lexo gjithashtu
